هرات کې د ښځو د نیولو په اړه د غبرګونو پر دوام، د افغانستان د بشري حقونو لپاره د ملګرو ملتونو ځانګړي راپور ورکوونکي ریچارد بنټ ویلي، هرات کې د ښځو نیول غیر قانوني او د نه منلو دي.
رخشانه: بنټ نن ماښام (شنبې د غبرګولي ۱۸ مه) په خپله اېکس پاڼه د یوه پوسټ په خپرولو سره لیکلي، هرات کې د حجاب نه رعایت کولو په تور د ښځو له نیول کېدو «په ژوره توګه اندېښنمن» دی.
د ملګرو ملتونو ځانګړي راپور ورکوونکي زیاته کړې، د طالبانو د خوښې وړ جامو نه اغوستو په تور د ښځو خپل سرې نیونې غیرقانوني او د نه منلو دي.
هغې د هراتي ښځو د نیونې د درولو غوښتنه کړې وايي، نیول شوې ښځې باید له ځنډ پرته خوشي کړای شي.
هرات کې د طالبانو محلي ادارې د روانې اوونۍ له شنبې ورځې راهیسې هرات کې د ښځو او نجونو پر تګ راتګ او جامو سخت محدودیتونه لګولي او لږ تر لږه ۲۰ ښځې او ځوانې نجونې یې، د ښار له بېلا بېلو برخو نیولې او نامعلوم ځای ته یې لېږدولې دي.
د طالبانو د امربالمعروف ځواکونو له خوا د هراتي ښځو او ځوانو نجونو نیونې، د بشري حقونو د فعالانو سخت غبرګونونه راپارولي او ګڼ هېوادوال یې غوسه کړي دي.
د هرات اوسېدونکو په دې ولایت کې د طالبانو والي ته په یوه لیک کې لیکلي، پر هراتي ښځو د محدودیتونو لګول، بې عدالتي او د دې ولایت له خلکو سره له کینې ډک چلند دی.
افغانستان کې د ملګرو ملتونو د سیاسي استازولۍ (یوناما) دفتر هم پرون په یوه اعلامیه کې لیکلي، چې هرات کې د لسګونو ښځو او نجونو نیول، د بشري حقونو په اړه جدي اندېښنې راپورته کوي.
د بښنې نړیوال سازمان آسیايي څانګې هم ویلي، دا نیونې د افغان ښځو او نجونو د ځپوونکي دوام یادونه کوي.
د طالبانو د امربالمعروف وزارت هرات کې د ښځو او ځوانو نجونو خپل سرو نیونو ته په غبرګون کې ویلي، دا ډول راپورونه له حقیقت نه لرې او «واقعیت» نه لري.
