په وروستیو دوه ورځو کې هرات ښار کې د لسګونو ښځو او ځوانو نجونو د نیولو په ترڅ کې د بښنې نړیوال سازمان آسیايي څانګې ویلي، دا نیونې د افغان ښځو او نجونو د ځپوونکي دوام یادونه کوي.
رخشانه: دې بنسټ نن (دوشنبې د غبرګولي ۱۸ مه) په خپله اېکس پاڼه د یوې اعلامیې په خپرولو سره لیکلي، هرات کې د حجاب نه مراعات کولو په تور د ښځو او نجون نیول د اندېښنې وړ دي.
د بښنې نړیوال سازمان اعلامیه کې راغلي، هره ښځه حق لري، چې د خپلو جامو په اړه تصمیم ونیسي، خپلواکه وګرځي، په عمومي ژوند کې ګډون ولري او له وېرې او ډار پرته ژوند وکړي.
دې بنسټ له طالبانو غوښتي، چې ژر تر ژره د نیول شویو ښځو د توقیف ځای اعلان کړي، د هغوی خوندي بېرته ستنېدو ډاډ ورکړي او د ښځو پر جامو محدودیتونه پای ته ورسوي.
د بښنې نړیوال سازمان ټینګار کړي، چې نړیواله ټولنه باید په بیړه په طالبانو فشار زیات کړي تر څو [دا ډله] د ښځو او نجونو منظمنه ځپنه ودوري.
هرات کې د طالبانو محلي ادارې د روانې اوونۍ له شنبې ورځې راهیسې هرات کې د ښځو او نجونو پر تګ راتګ او جامو سخت محدودیتونه لګولي دي او لسګونه ښځې او ځوانې نجونې یې، د ښار له بېلا بېلو برخو نیولې او نامعلوم ځای ته یې لېږدولې دي.
په هغه ویډیو کې چې په ټولنیزو رسنیو خپره شوې، د طالبانو د امربالمعروف ځواکونه په ښار کې د ګزمې په حال کې دي.
په یوه ویډیو کې لیدل کېږي، چې دوه ښځې د طالبانو د امربالمعروف ځواکونو له خوا نیول کېږي. دغه دوه ښځې د دوه نارینه مامورینو له خوا نیول کېږي.
د ځايي سرچینو د راپور له مخې د شنبې ورځې راهیسې لږ تر لږه ۲۰ ښځې او ځوانې نجونې د «حجاب نه مراعت کولو، ماسک نه درلودو او وېښتانو ښکارېدو» په تور د هرات ښار له بېلا بېلو برخو د طالبانو د امربالمعروف ځواکونو له خوا نیول شوې دي.
د طالبانو د امربالمعروف ځواکونو له خوا د هراتي ښځو او ځوانو نجونو نیونې، د بشري حقونو د فعالانو سخت غبرګونونه راپارولي او ګڼ هېوادوال یې غوسه کړي دي.
د هرات اوسېدونکو په دې ولایت کې د طالبانو والي ته په یوه لیک کې لیکلي، پر هراتي ښځو د محدودیتونو لګول، بې عدالتي او د دې ولایت له خلکو سره له کینې ډک چلند دی.
افغانستان کې د ملګرو ملتونو د سیاسي استازولۍ (یوناما) دفتر هم پرون په یوه اعلامیه کې لیکلي، چې هرات کې د لسګونو ښځو او نجونو نیول، د بشري حقونو په اړه جدي اندېښنې راپورته کوي.
