افغانستان کې د ملګرو ملتونو د سرمنشي د ځانګړي استازي، مرستیاله او د یوناما سرپرسته جورجت ګانیون وايي، طالبانو په هرات کې شاوخوا ۳۰ ښځې د حجاب نه رعایت کولو په تور نیولي دي.
رخشانه: ګانیون نن ماښام (دوشنبې د غبرګولي ۱۸ مه) د افغانستان لپاره د ملګرو ملتونو امنیت شورا ځانګړې ناسته کې ویلي، افغانستان کې ښځې او نجونې له سختو او پراخو محدودیتونو سره مخ دي.
هغې په دې ناسته کې زیاته کړې، د افغان ښځو او نجونو په وړاندې د طالبانو شدید او پراخ محدودیتونه، د ټولو وګړو لپاره نه جبرانېدونکې پایلې لري.
د یوناما سرپرستې ټینګار کړی، چې د ښځو په زده کړو او کار کې په ګډون د طالبانو بندیزونه، د افغانستان اقتصاد ته زیان رسوي.
ګانیون ویلي، هېواد کې د نجونو پر تحصیل د طالبانو محدودیتونه، د روغتیا او زده کړو په برخه کې د متخصصه ښځینه ځواک د کمېدو لامل شوي دي.
هغې ټینګار کړي، چې دا محدودیتونه په مستقیم ډول د عمومي خدماتو په وړاندې کولو اغېز کوي، روغتیايي پاملرنو ته د خلکو په ځانګړې توګه د ښځو او ماشومانو لاسرسی لندوي او د مور او ماشوم د روغتیا پایلې لا ناوړه کوي.
ګانیون پر دوام ویلي، اټکل کېږي، چې د ۷ څخه تر ۱۸ کلنو ۳.۸ میلیونه نجونې ښوونځي ته له تګ څخه بندې شوې دي. هر کال شاوخوا ۲۵۰ زره نورې نجونې په دوامداره توګه د منځنیو زده کړو له لارو محرومېږي.
د ملګرو ملتونو دې چارواکې د ښځو او نجونو پر زده کړه او کار د طالبانو د محدودیتونو لغوه کولو غوښتنه کړې وايي، د دې محدودیتونو لغوه کول د افغانستان د ټولو خلکو په ګټه دي.
نوموړې همدارنګه د ملګرو ملتونو اړوند دفترونو او بنسټونو ته د دې سازمان د ښځینه کارکوونکو د لاسرسي بندیز ته اشاره کړې وايي، دا محدودیتونه نه جبرانېدونکې پایلې له ځان سره لري.
مېرمن ګانیون د طالبانو له خوا د زوجینو جلاوالي قانون د بشري حقونو له ارزښتونو سره په ټکر کې وباله وايي، دا سند د یوه داسې سیستم په بنستیز کېدو تمامېږي، چې د بشري حقونو په برخه کې د افغانستان د نړیوالو ژمنو سره په تضاد کې دی.
دې له ګاوڼدیو هېوادونو د افغان کډوالو راستنېدو ته هم اشاره کړې وايي، له ۲۰۲۳ کال راهیسې تر اوسه پورې نېږدې ۵.۹ میلیونه کسان هېواد ته راستانه شوي او اټکل کېږي، چې سږ کال ۲.۸ میلیونه نور کسان هم هېواد ته راستانه شي.
نوموړې ویلي، افغانستان لا هم د نړۍ یو له سترو بشري بحرانونو سره مخ هېوادونو څخه دی. په ۲۰۲۶ کال کې به شاوخوا ۲۱.۹ میلیونه خلک، چې د ټول نفوس ۴۵ سلنه کېږي، بشري مرستو ته اړتیا ولري.
