د هرات په جبرییل ښارګوتي کې د دریو تنو لاریون کونکو تر ټپي کېدو وروسته، د افغانستان د بشري حقونو لپاره د ملګرو ملتونو راپور ورکوونکي ریچارد بنټ، د طالبانو له لوري د لاریونوالو ځپلو په اړه اندېښنه څرګنده کړې ده.
رخشانه: بنټ نن (سه شنبه د غبرګولي ۱۹ مه) په خپله اېکس پاڼه د یوه پوسټ په خپرولو سره لیکلي، «هرات کې د سوله ییزه اعتراضونو په وړاندې له حده زیاتې زور کاروونې په اړه په ژوره توګه اندېښمن یو.»
هغه پر دوام زیاته کړې «اوس د دې وخت رارسېدلی چې تاوتریخوالی کم شي، د خلکو په ځانګړې توګه د ښځو او نجونو د بیان آزادۍ ته درناوی وشي.»
بنټ د [د هرات د جبرییل ښارګوټي لاریون کوونکو ته] د زیان رسولو د مخنیوي غوښتنه کړې ده.
د افغانستان د بشري حقونو لپاره د ملګرو ملتونو ځانګړي راپور ورکوونکي ویلي، د تاوتریخوالي عاملین باید په نښه او ځواب ویوونکي شي.
نن سهار د هرات جبرییل ښارګوونکي کې سرچینو رخشانې رسنۍ ته ویلي وو، چې د دې ښارګووټي لسګونو تنو، د طالبانو له لوري د بې حجابۍ په تور د ښځو نیولو په غبرګون کې اعتراضي غونډه وکړه.
د سرچینو په وینا، د دې اعتراضي غونډې د جوړېدو په جریان کې، طالب ځواکونو د معترضینو د ځپلو په موخه پر هغوی مخامخ ډزې وکړې او لږ تر لږه درې تنه یې ټپيان کړل.
د طالب ځواکونو له خوا د لاریونوالو د ځپلو په هغه وډیوګانو کې چې په ټولنیزو شبکو خپرې شوې هم لیدل کېږي، چې طالب ځواکونه د معترضانو په لور ډزې کوي.
عیني شاهدانو ویلي، دغه اعتراضي غونډه له څو ساعته وروسته، د طالبانو د ځانګړې قطعې ځواکونو په رارسېدو سره پای ته ورسېده. د عیني شاهدانو په وینا، طالب ځواکونه دا مهال کوڅه په کوڅه د لاریونوالو د نیولو په لټه کې دي.
