ملګرو ملتونو کې د برېتانیا د ځانګړي استازي مرستیال آرچي یانګ د افغانستان په اړه د امنیت شورا په غونډه کې ویلي، افغانستان کې د ښځو او نجونو او مذهبي لږکیو د حقونو کمزوري کولو دوام د اندېښنې وړ دی.
رخشانه: یانګ د افغانستان په اړه د ملګرو ملتونو د امنیت شورا د دوشنبې ورځې (غبرګولي ۱۸ مې) په غونډه کې، د ښځو او نجونو په وړاندې د طالبانو فرمانونه او محدودیتونه وغندل.
هغه په دې ناسته کې ویلي دي: «د طالبانو وروستي فرمانونه [د زوجینو جلاوالي قانون] جنسیتي نابرابري لا بنسټیزه کوي، عدالت ته لاسرسی محدودوي او تبعیض کوونکي چلندونه په رسمیت پېژني.»
ملګرو ملتونو کې د برېتانیا استازي د ښځو او نجونو په وړاندې د طالبانو د سختو قوانینو او له تبعیض نه ډکو محدودیتونو د لغوه کولو غوښتنه وکړه وايي، دا قوانین د نړیوالو قوانینو سره په ټکر کې دي.
یانګ زیاته کړې، چې له افغان ښځو او نجونو د ملاتړ ژمن هېوادونه له خپلو شریکانو سره هڅه کوي، د مرستو وړاندې کولو تګلاره کې د ښځو ګډون خوندي شي او سره له ګڼو محدودیتونو بشردوستانه مرستو ته د هغوی لاسرسی تضمین شي.
ملګرو ملتونو کې د برېتانیا ځانګړي ویلي، امنیت شورا په افغانستان کې د یوناما ماموریت د تمدید ارزولو په حال کې ده. هغه په افغانستان کې د دې ماموریت په تمدید ټینګار کړی دی.
هغه د خپلو خبرو په پای کې له طالبانو وغوښتل، چې په خپلو ژمنو عمل وکړي او «د یوه ثبات لرونکي افغانستان تر لاسه کولو لپاره د ملګرو ملتونو په مشرۍ په څو اړخیزه تګلاره کې په رغنده توګه برخه واخلي.»
د ملګرو ملتونو امنیت شورا د دوشنبې په شپه (د غبرګولي ۱۸ مه) د افغانستان په اړه غونډه جوړه کړې وه. په دې ناسته کې، افغانستان کې د یوناما سرپرستې و ویل، افغان ښځې او نجونې له سختو او پراخه محدودیتونو سره مخ دي.
نوموړې په دې ناسته کې د افغان ښځو او نجونو په وړاندې د طالبانو پراخ او سخت محدودیتونه، د ټولو وګړو لپاره نه جبرانېدونکې پایلې لري.
د یوناما سرپرستې ټینګار وکړ، چې د ښځو په زده او په کار کې پر ګډون د طالبانو محدودیتونه د هېواد اقتصاد ته زیان رسوي.
