د هرات جبرئیل ښارګوټي د اوسېدونکو پر اعتراضیه غونډه، د طالبانو له لوري له ځپلو، نیولو او مخامخ ډزو وروسته، د بښنې نړیوال سازمان آسیايي څانګې، د طالبانو له خوا د معترضینو ځپل په کلکه غندلي دي.
رخشانه: دې سازمان نن ماښام (سه شنبې د غبرګولي ۱۹ مه) په یوه اعلامیه کې، د هرات د جبرئیل د لاریونیانو ځپلو او پر هغوی مخامخ ډزو ته غبرګون ښودلی دی.
دې سازمان په خپله اعلامیه کې لیکلي «هرات ولایت کې د ښځو د خپل سرې نیونې په غبرګون کې په معترضینو د طالب ځواکونو د ډزو راپور د ژورې اندېښنې وړ دی.»
دې بنسټ زیاته کړې «پر لاریونینو ډزې په افغانستان کې د سوله ییزو لاریونونو، د بیان پر آزادۍ او د ښځو پر حقونو د طالبانو د پرلپسې بریدونو یو ټاکان ورکوونکی زیاتوالی دی. هغه کسان چې په سوله ییزه توګه لاریون کوي، هېڅ کله باید له مرمۍ او تاوتریخوالي سره مخ نه شي.»
د بښنې نړیوال سازمان ټینګار کړی، طالبان باید ژر تر ژره د معترضینو په وړاندې د زور کارول ودروي، نیول شوي کسان خوشي کړي، د ښځو او نجونو حقونو، له هغې جملې د هغوی د تګ راتګ آزادۍ، د بیان آزادۍ او سوله ییزه راغونډېدو ته درناوی وکړي.
هرات کې د طالبانو له لوري د بې حجابۍ په تور د ښځو او ځوانو نجونو نیونه، د روانې اوونۍ د شنبې له ورځې دوام لري.
طالبانو د دې اوونۍ له پیل راهیسې، د هرات ښار له بېلا بېلو سیمو لسګونه ښځې او ځوانې نجونې د حجاب نه لرلو په تور نیولې او نامعلوم ځای ته یې لېږدولې دي.
نن سهار د هرات د جبرئیل ښارګوټي لسګونه تنه اوسېدونکو، د طالبانو له لوري د لسګونه ښځو او نجونو د نیولو په غبرګون کې په اعتراضي غونډه وکړه. دغه اعتراضي غونډه تر شاوخوا دوه ساعتونو وروسته، د طالب ځواکونو له خوا وځپل شوه.
طالبانو د دې اعتراضي غونډې د ځپلو په جریان کې، په لاریونیانو مخامخ ډزې وکړې. په دې ناتار ډزو کې لږ تر لږه درې تنه ټپیان او د یوه ماشوم په ګډون دوه تنه و وژل شول.
