د طالبانو له لوري د هرات د جبرئیل د یو شمېر اوسېدونکو د اعتراضي غونډې ځپل، نیول او پر هغوی مخامخ ډزو ته د غبرګونونو پر دوام، د افغانستان د بشري حقونو مرکز وايي، د طالبانو دا اقدام د بشري حقونو ښکاره سرغړونه ده.
رخشانه: دې مرکز پرون سه شنبې د (غبرګولي ۱۹ مه) په یوه بیانیه کې «د طالبانو له لوري د هرات د جبرئیل ښارګوټي د اوسېدونکو سوله ییز لاریون په تاوتریخوالي او خونړۍ توګه ځپل» په کلکه غندلي دي.
د افغانستان د بشري حقونو مرکز ویلي «د هغه کسانو په وړاندې چې د خپلو مشروع غوښتنو لپاره په سوله ییزه توګه راټول شوي، د زور، وسلې او تاوتریخوالي کارول، له بشري حقونو ښکاره سرغړونه او د طالبانو له لوري د افغانستان د خلکو د وېرولو، ډار او غږ غلي کولو د سیاست دوام دی.»
د دې مرکز په بیانیه کې راغلي، طالبانو په زور او تاوتریخوالي سره د هرات د جبرئیل ښارګوټي د اوسېدونکو سوله ییزه غونډه ځپلې، لږ تر لږه ۳۰ اعتراض کوونکي یې ټپیان کړي او دوه تنه یې په مخامخ ډزو وژلي دي.
د افغانستان د بشري حقونو مرکز زیاته کړې، د لاریونیانو په وړاندې مخامخ ډزې کول، د ملکي وګړو په وړاندې د زور او وسلې غیرقانوني او نامنتاسب استعمال او د ژوند حق، د شخصي امنیت حق او د سوله ییزې غونډې حق څخه قصدي سرغړونه کېدای شي.
دې مرکز په خپله اعلامیه کې ټینګار کړي، چې داپېښه د خلکو له حقونو او بنسټیزو خپلواکیو، له هغې جملې د بیان آزادۍ، د سوله ییزه غونډو له آزادۍ، د شخصي خوندیتوب حق او د ژوند له حق څخه ښکاره سرغړونه ده.
د افغانستان د بشري حقونو مرکز ویلي، طالبانو په تېرو نېږدې پنځو کلونو کې د مدني اعتراضونو په ځپلو، د خلکو د سوله ییز ګډون زمینې له منځه وړې او د خلکو مشروع غوښتنې، په ځانګړې توګه د ښځو غوښتنې یې په منظمه توګه له پامه غورځولې دي.
دې مرکز له ملګرو ملتونو، د بشري حقونو مدافع نړیوالو بنسټونو او دولتونو غوښتي، چې د افغان وګړو په ځانګړې توګه د ښځو او نجونو له اساسي حقونو ملاتړ وکړي او د هغوی د خپل سرو نیونو او منظمې څپلې په وړاندې چوپ پاتې نه شي.
همدارنګه د افغانستان د بشري حقونو مرکز د تېرې ورځې د ټولو نیول شویو لاریون کوونکو ښځو او نجونو، چې د طالبانو له لوري د بې حجابۍ په تور په تېرو څو ورځو کې نیول شوې، د ژر تر ژره خوشي کېدو غوښتنه کړې ده.
دې مرکز ټینګار کړی، چې د یوې خپلواکې پلټوونکې تګلارې په رامنځ ته کولو باید دا او د بشري حقونو د سرغړونې ټولې پېښې باید مستندې شي، طالبان باید د بشري حقونو د سرغړونو په توګه ځواب و وايي او د هغوی د تعقیب زمینه باید برابره شي.
پرون سهار، د هرات ښار د جبرئیل ښارګوټي لسګونه اوسېدونګو د طالبانو له لوري د ښځو او نجونو د نیولو په غبرګون کې اعتراضي غونډه وکړه. دا اعتراضي غونډه له دوه ساعت وروسته د طالب ځواکونو له خوا وځپل شوه.
طالبانو دې اعتراضي غونډې د ځپلو په جریان کې، په معترضینو مخامخ ډزې وکړې. د دې ناتار ډزو په ترڅ کې درې تنه ټپیان او د یوه ماشوم په ګډون دوه تنه وژل شوي دي.
