د افغانستان د فوټبال ښځینه ملي لوبډلې پخوانۍ لوبډلمشره خالده پوپل د ټایم مجلې له لوري د ۲۰۲۶ کال د نړۍ د ۱۰۰ اغېزناکو سپورتي څېرو په لومړي نوملړ کې شامله شوه.
رخشانه: دا نوملړ پرون سه شنبې د (غبرګولي ۱۹ مه) د ۲۰۲۶ کال لپاره د TIME100 Sports په سرلیک سره د لومړي ځل لپاره د ټایم مجلې له لوري خپور شو.
ټایم مجلې لیکلي، په دې نوملړ کې د خالدې پوپل نوم، د ښځو سپورت د پراختیا او د افغان ښځینه لوبغاړو د حقونو په ملاتړ کې د هغې د مهم رول له امله، په دې نوملړ کې شامل شوی دی.
دې مجلې زیاته کړې، خالده پوپل یو وخت په افغانستان کې د ښځو د فوټبال یوه وتلې څېره وه. هغې په ۲۰۰۷ کال کې د ملګرو ملتونو په مرسته د افغانستان د ښځو فوټبال ملي لوبډله جوړه کړه. هغه د دې لوبډلې د لومړنۍ لوبډل مشرې په توګه پېژندل کېږي.
ټایم مجلې لیکلي، پوپل دا مهال په ډنمارک کې ژوند کوي. نوموړې د افغان ښځو د فوټبال لوبډلې «افغان وومن یونایټډ (Afghan Women United) تنظیموونکې ده، دا لوبډله د افغانستان د ښځو فوټبال ملي لوبډلې د پخوانیو غړو او د هېواد له نورو کډوالو جوړه شوې ده.
خالده پوپل د فوټبال او ښځو د حقونو د فاع په برخو کې د کلونو فعالیت وروسته، په نړیواله کچه د افغانستان د ورزش یو له تر ټولو پېژندل شویو څېرو باندې بدله شوې ده.
ملګرو ملتونو (United Nations)هم څه موده وړاندې اعلان وکړو، چې د افغانستان د فوټبال ښځینه ملي لوبډلې لوبډلمشره خالده پوپل، د نړۍ د فوټپال د ۱۶ وتلو څېرو په نوملړ کې راغلې ده.
ملګرو ملتونو ویلي وو، دا کسان د دې هدف لپاره معرفي شوي، چې «د دوامداره پراختیايي اهدافو په اړه د پوهاوي لوړولو او د خلکو او ځمکې د کرې د ښې راتلونکې لپاره د خپل دریځ او شهرت څخه کار واخلي.»
د افغانستان د ښځو فوټبال ملي لوبډله په ۲۰۲۱ کې د طالبانو په بیا واکمنېدو سره وپاشل شوه. طالبانو د سختو محدودیتونو په لګولو سره، د ښځو هر ډول ورزش بند کړ او ویې ویل، د افغانستان ټولې ښځینه لوبډلې په رسمیت نه پېژني.
د افغانستان د ښځینه فوټبال ملي لوبډلې غړي، د طالبانو تر بیا واکمنېدو وروسته، له هېواده ووتلې او دا مهال په استرالیا، برېتانیا، آلبانیا، پرتغال او امریکا کې پناه اخیستې ده.
فیفا هم څه موده وړاندې اعلان وکړ، چې په جلاوطنۍ کې د افغانستان د فوټبال ښځینه ملي لوبډله په رسمیت پېژني او دا لوبډله کولی شي، په نړیوالو ډګرونو کې د افغانستان استازتوب وکړي.
