د «جنبش آزادګان در تبعید» غورځنګ غړو، د هرات د جبرئیل ښارګوټي د لاریونیانو د ځپلو په غبرګون کې ویلي، د ښځو نیول او له خلکو سره د تاوتریخوالي ډک چلند کول، د آزادۍ غوښتونکو غږونو د غلي کولو لپاره د طالبانو د سیاست دوام دی.
رخشانه: د دې اعتراضي غورځنګ غړو نن (چهارشنبې د غبرګولي ۲۰ مه) په یوه بیانیه کې، د ښځو نیول، د معترضینو ځپل او د جبرئیل ښارګوټکي په معترضو لاریونیانو د طالبانو مخامخ ډزې په کلکه وغندلې.
په دې اعلامیه کې راغلي، د هرات جبرئیل د اوسېدونکو پروني اعترضونه، د خلکو د فریاد اعتراض دی، چې په تېرو پنځو کلونو کې د ځپلو، تبعیض، محرومیت او له خپلو اساسي حقونو د منظم حذف تر سیوري لاندې ژوند کوي.
د دې غورځنګ غړو ویلي، د ښځو نیول او له خلکو سره د طالبانو له تاوتریخوالي ډک چلند، د بشري حقونو ښکاره سرغړونه او د دې ډلې له لوري د آزادۍ غوښتونکو غږونو د غلي کولو یو منظم سیاست دی.
دوی زیاته کړې، دا کړنې د طالبانو له خوا د جنسیتي توپير، د مدني آزادیو د محدودیت او د ټولنې د نیمايي برخې د تر ټولو اساسي بشري حقونو څخه، د محرومیت پر بنسټ د رامنځ ته شوي نظام پر بنسټ ولاړه ده.
دې غورځنګ ویلي: «هغه څه چې نن افغانستان کې دوام لري، نه یوازې د ښخو د حقونو سرغړونه، بلکې د جنسیتي توپیر یو بل ډول دی، چې باید د نړیوالې ټولنې له خوا د جرم په توګه په رسمیت وپېژندل شي او د هغو عاملین [طالبان] تر پوښتنې لاندې راولي.»
دوی له ملګرو ملتونو، د بشري حقونو شورا، دولتونو او د بشري حقونو له مدافع بنسټونو غوښتي، چې د «سمبولیکه دریځ نیونې» پر ځای د افغان ښځو د ملاتړ، د نیول شویو کسانو د خوشي کولو او د طالبانو د ځواب وینې لپاره جدي تصمیم ونیسي.
معترضې ښځې وايي، د طالبانو له لوري د افغان ښځو د ځپلو په تړاو د نړیوالې ټولنې او د بشري حقونو چوپتیا، د بې عدالتۍ عادي کول او له هغه اصولو سترګې پټول دي، چې نړیواله ټولنې له هغې د دفاع ادعا کوي.
پرون سهار، د هرات ښار د جبرئیل ښارګوټي لسګونه اوسېدونګو د طالبانو له لوري د ښځو او نجونو د نیولو په غبرګون کې اعتراضي غونډه وکړه. دا اعتراضي غونډه له دوه ساعت وروسته د طالب ځواکونو له خوا وځپل شوه.
طالبانو دې اعتراضي غونډې د ځپلو په جریان کې، په معترضینو مخامخ ډزې وکړې. د دې ناتار ډزو په ترڅ کې درې تنه ټپیان او د یوه ماشوم په ګډون دوه تنه وژل شوي دي.
د طالبانو له لوري د دې اعتراضي غونډې ځپلو د خلکو، بنسټونو او د بشري حقونو د فعالانو سخت غبرګونونه راپارولي دي.
