د هرات جبرئیل ښارګوټي او کابل دشت برچي کې ځايي سرچینې او عیني شاهدان وايي، طالبانو د لاریونونو او اعتراضي غونډو د مخینوي په موخه، په دې دوه سیمو کې ګن شمېر ځواکونه ځای پر ځای کړي دي.
رخشانه: د هرات جبرئیل کې دوه ځايي سرچینو او د کابل دشت برچي کې یوه عیني شاهد رخشانې رسنۍ ته ویلي، طالبانو په دې دوه سیمو کې د ځانګړې قطعې ځواکونه ځای پر ځای کړي دي.
د هرات جبرئیل ښارګوټي کې دوه سرچینو ویلي، د طالبانو د ځانګړې قطعې ځواکونه د پنشنبې په سهار ۱۱ بجې (د غبرګولي ۲۱مه) دې سیمې ته ورغلي دي.
د سرچینې په وینا، د طالبانو د ځانګړې قطعې شاوخوا ۲۰ رنجر موټر جبرئیل ته د ننه شوي او د دې سیمې په کوڅو کې ګزمې کوي او وروسته په د کوڅو په سر یا څلور لارو کې درېږي.
سرچینو زیاته کړې، د دې ځواکونو له شتون وروسته، جبرئیل ښارګوټي او شاوخوا سیمو نظامي حالت غوره کړی دی.
په ورته وخت د کابل لوېدیځ دشت برچي سیمه کې یوه عیني شاهد د هویت پټ ساتلو سره رخشانې رسنۍ ته ویلي دي، چې نن سهار (جمعه د غبرګولي ۲۲ مه) د طالبانو د ځانګړې قطعې ځواکونه په دې سیمه کې ځای پر ځای شوي دي.
د دې عیني شاهد په وینا، دشت برچي «نظامي حالت» ځان ته غوره کړی دی او طالب ځواکونه «له پل خشک نه تر نقاش» پورې پراخ حضور لري او د کوڅو په سر کې ولاړ دي.
دې عیني شاهد زیاته کړې، دشت برچي کې د طالب ځواکونو په زیاتېدو سره، په ښار کې د خلکو په ځانګړې توګه د ښځو شتون تت شوی دی.
د طالبانو له لوري د هرات جبرئیل ښارګوټي کې د اعتراضونو تر ځپلو او څو لاریونیانو تر وژلو او ټپي کېدو وروسته، د هرات جبرئیل او کابل دشت برچي کې کې د اعتراضي غونډو د تر سره کېدو اعلامیې په ټولنیزو شبکو خپرې شوې دي.
