د بامیان ولایت یکاولنګ نمبر یک ولسوالۍ کې ځايي سرچینې وايي، دې ولسوالۍ کې یو ځوان هغه مهال د سړي تښتوونکو له خوا و وژل شو، چې د خپلې خور د تښتولو مخنیوی یې وکړ.
رخشانه: یکاولنګ نمبریک ولسوالۍ کې لږ تر لږه دریو سرچینو رخشانۍ رسنۍ ته ویلي، دا پېښه د چهارشنبې په ورځ (د غبرګولي ۲۰ مه) د دې ولسوالۍ په «شمس الدین» کلي کې رامنځ ته شوې ده.
د سرچینوپه وینا، دا پېښه هغه مهال رامنځ ته شوې، چې څلورو تنه وسله وال کسان د یوې ۱۲ کلنې نجلۍ د تښتولو په موخه یوه کور ته داخل شوي دي.
سرچینې زیاته کړې، د دې نجلۍ ځوان ورور د وسله والو کسانو څخه د خور د ژغورلو په موخه، د سړي تښتوونکو له خوا په مرمۍ ویشتل شوی او «په ډېر ناوړه توګه» وژل شوی دی.
سړي تښتوونکي د دې نجلۍ د تښتولو له ناکامې هڅې او د هغې د ورور له وژلو وروسته، له سیمې پښې سپکې کړې دي.
د سرچینو په وینا، دا ځوان محمد امین نومېده او ۱۹ کلن وو، هغه د کورنۍ یوازینۍ زوی وو.
ځايی سرچینو زیاته کړې، سړي تښتوونکي د طالب ځواکونو د یوه غړي په امر ې نجلۍ د تښتولو په موخه دې کور ته د ننه شوي وو.
د طالبانو دا غړی، چې د خپلې ښځې په وژنه هم تورن دی، د طالبانو له بیاواکمنېدو وروسته له دغې ډلې سره یو ځای شو او په دې وروستیو کلونو کې یې عام خلک ځورول.
بامیان کې د طالبانو د والي ویاند فرزان سیغاني د دې پېښې پخلی کړی وايي، «د خپلې خور د ژغورلو په هڅه کې د یوه ځوان د قتل په تور» یو تن نیول د امنیتي ځواکونو سره په نښته کې وژل شوی دی.
سیغاني ویلي، دا کس علي د حسین زوی او د یکاولنک ولسوالۍ د «سرترنوک» سیمې اوسېدونکي وو، چې پرون جمعه د (غبرګولي ۲۲ مه) د دې ډلې له امنیتي ځواکونو سره په نښته کې وژل شوی دی.
بامیان کې د طالبانو د والي ویاند په دې اړه، چې دغه کس د دې ډلې غړی وو که نه، څه نه دي ویلي.
