افغانستان کې د ملګرو ملتونو د بشري مرستو د همغږۍ دفتر (اوچا) وايي، د طالبانو تر واک لاندې افغانستان کې روان بحران ښايي نور د خبرونو سرټکی نه وي، خو اغېز یې هره ورځ د میلیونونو کورنیو له خوا احساسېږي.
رخشانه: دې بنسټ نن (دوشنبې د چنګاښ ۱۵ مه) په خپله اېکس پاڼه د یوه پوسټ په خپرولو سره، د طالبانو تر واک لاندې افغانستان کې روان بحران په اړه خبرداری ورکړی دی.
افغانستان کې د ملګرو ملتونو د بشري مرستو د همغږۍ دفتر وايي «رغونه، تر بېړنیو اړتیاوو پوره کولو څخه ورپورته ده.»
د دې بنسټ په وینا، «د راتلونکې د جوړولو لپاره د معیشت بیارغونه، د انعطاف پیاوړتیا او د ټولنو سره مرسته کول، لا هیله بښوونکې ده.»
اوچا زیاته کړې، د طالبانو تر واک لاندې افغانستان کې ډېری کورنۍ د خپل ژوند د اړتیاو خوندي کولو برخه کې له ستونزو سره مخ کېږي.
دې بنسټ پکتیکا کې د یوې ښځې له قوله لیکلي: «مېړه ته مې و ویل، نو نه شم کولی د وزوو د خوړو تر ودو و ووځم، باید هغه وپلورو، ځکه د اولادونو خېټې مړولو برخه کې ستونزو لرو.»
د اوچا او یونیسف په ګډون مرسته کوونکو بنسټونو په وار وار د طالبانو تر واک لاندې افغانستان کې د شدید انساني بحران خبرداری ورکړی دی.
د ملګرو ملتونو د خوړو نړیوالو پروګرام (WFP) څه موده وړاندې افغانستان کې انساني بحران ته په اشارې ویلي، په راتلونکو شپږو میاشتو کې په افغانستان کې د خپلو ژغورونکو عملیاتو د دوام لپاره ۳۵۰ میلیونه ډالره بودجې ته اړتیا ده.
