بلخ کې یو شمېر سوداګرې ښځې په جنسیتي جلاوالي سره د «مولانا جلال الدین بلخي درېیم ملي او نړیوال نندارتون» له جوړېدو شکایت کوي وايي، د طالبانو محدودیتونو د دوی د محصولاتو خرڅلاو او بازار موندنه محدوده کړې ده.
رخشانه: بلخ ولایت کې لږ تر لږه څلورو تنو ښځو چې «مولانا جلال الدین بلخي درېیم ملي او نړیوال نندارتون» کې یې ګډون کړی رخشانې رسنۍ ته وی ویل، دا نندارتون هم د تېرې کال په شان په جنستي جلاوالي سره تر سره شو.
دا ندارتون د کورنیو تولیدانو د پېژندنې، بازار موندنې او د هېواد له کورني صنعت څخه د ملاتړ په پار، پرون شنبې (د چنګاښ ۲۰ مه) د مزارشریف ښار الماس هوټل کې پرانستل شو او تر سبا پورې به دوام ولري.
په دې درې ورځني نندارتون کې د صنعت کارانو تولیدات په ۱۷۰ غرفو کې نندارې ته وړاندې شوي، چې له ۶۰ زیاتې غرفې یې سوداګرو ښځو ته ځانګړې شوې دي.
د ښځو او نارینه وو غرفې په جنستي جلاوالي سره په جلا ځایونو کې په پام کې نیول شوې، په داسې ډول، چې نارینه کتونکي ښځینه برخې ته د ننوتو اجازه نه لري او ښځینه کتونکې د نارینه وو برخې ته.
بلخ کې سوداګرو مېرمنو ویلي، د طالبانو د امر سره سم، په دې نندارتون کې خبریالانو ته له ښځینې برخې د انځور اخیستو اجازه نه ده ورکړل شوې.
په دې نندارتون کې د ښځو په لاسي صنایعو کې، سیمه ییزې جامې او په لاس ګندل شوي توکي، ګاڼې، بکسونه، خوراکي محصولات، کرنیز مصحولات او نور کورني تولیدات نندارې ته وړاندې شوي دي.
بلخ کې په (مستعار نوم) یوه سوداګره فرشتې د دې نندارتون له جوړېدو هرکلی وکړ، خو وايي، دې نندارتون کې د جنسیت جلاوالی د دې لامل شوی، چې د دوی محصولات ونه پلورل شي.
په (مستعار نوم) یوه بله سوداګره مېرمن محبوبه وايي، د جنسیت جلاوالی او د طالبانو له خوا د پرانستلو په څرنګوالي محدودیتونه، د دې لامل کېږي، چې له دوی د بازار موندنې فرصت له لاسه واخلي.
هغې ویلي: «زموږ ډېری پېرودونکي کورنۍ دي، او کله چې نارینه وو ته د ښځینه غرفو د کتلو اجازه ورنه کړل، په نندارتون کې د ښځو حضور هم کم رنګه کېږي او زموږ خرڅلاو هم راکښته کېږي.»
لیدونکو د دې نندارتون له جوړېدو هرکلی کړی او له طالبانو یې غوښتي، چې له سوداګرو مېرمنو ملاتړ وکړي.
یو تن ننداره کوونکي ویلي دي: «ښځې چې کله په نندارتون کې غرفه نیسي، ملاتړ ته اړتیا لري. ملاتړ او له ښځو پېرودونه، هغوی ته د لا زیات کار انګېزه ورکوي. نو باید له هغوی توکي واخلو تر څو نورې هم وهڅول شي.»
طالبانو تېر کلونه هم دا نندارتون د جنسیتي جلاوالي سره په بلخ کې جوړ کړی وو.
