افغانستان کې د ملګرو ملتونو د بشري مرستو د همغږۍ دفتر (اوچا) ویلي، ښځې او نجونې لا هم د افغانستان د بشري ناورین زیات زیان ویني.
رخشانه: دې بنسټ نن (سه شنبې د چنګاښ ۲۳ مه) د یوه راپور په خپرولو سره ویلي، په ۲۰۲۶ کال، په افغانستان کې له ۱۰.۷ میلیونه څخه زیاتې ښځې او نجونې بشري دوستانه مرستو ته اړتیا لري.
اوچا په خپل راپور کې لیکلي، د ښځو په تګ راتګ، زده کړې او کار د طالبانو سخت محدودیتونو، همدارنګه اساسي خدماتو ته د هغوی لاسرسی محدود کړی، د خوندیتوب اړوند ګواښونه یې زیات کړي او شته زیان مننه یې سخته کړې ده.
دې بنسټ زیاته کړې، په ټول هېواد کې بشري همکارانو د روغتیايي وضعیت د خرابېدو، د خوراکي توکو د خوندیتوب د زیاتوالي او د ښځینه کارکوونکو له خوا وړاندې شویو خدمتونو ته د لاسرسي د کموالي په اړه اندېښنه ښودلې ده.
افغانستان کې د ملګرو ملتونو د بشري مرستو د همغږۍ دفتر د راپورله مخې، په افغانستان کې روغتیايي برخه لا هم تر سخت فشار لاندې ده.
راپور کې راوړل شوي، افغانستان لا هم د میندو د مړینې له پلوه په نړۍ کې لوړه کچه لري. د اټکلونو له مخې په ۲۰۲۴ کې له هر ۱۰۰ زره ژوندیو زېږونو ۶۸۳ میندو ژوند له لاسه ورکړی، دا په آسیا کې تر ټولو لوړه کچه او په نړۍ کې اومه کچه ښيي.
اوچا وايي، روغتیايي برخه کې د ښځینه کارکوونکو او بودجې کمښت، اړینو درملو ته محدود لاسرسی او د بېړنیو مراقبتي خدماتو کموالي، د میندو او ماشومانو د مخنیوي وړ مرګ زیات کړی، په ځانګړې توګه په کلیوالي سیمو کې.
اوچا اعلان کړی، چې د نجونو په زده کړو د طالبانو پرلپۍې محدودیتونو د ښځینه ډاکترانو، نرسانو او قابلو د راتلونکي کمښت په اړه د بشري سازمانونو اندېښنې راپارولې دي.
دې بنسټ د یونیسف د راپور له مخې ویلي، که د افغان نجونو په وړاندې د طالبانو محدودیتونه دوام وکړي، نو دا هېواد به ۲۰۳۰ پورې ښايي د ۲۵ زره ښځینه ښوونکې او ښځینه روغتیايي کارکوونکي له لاسه ورکړي.
د اوچا په وینا، د ملګرو ملتونو یوه پلاوي بامیانو ته د سفر پر مهال، د دې ولایت له ولایتي روغتون څخه لیدنه کړې ده. اوچا ویلي، دا مرکز د میندو او نوي زېږون لازمي روغتیايي خدماتو ساتلو لپاره د پام وړ فشار سره مخ دی.
د دې روغتیايي مرکز کارکوونکو ټینګار کړیو ډېری ښځې هغه مهال روغتون ته راځي، چې د امیندوارۍ یا ماشوم زېږون جدي اختلاطات رامنځ ته شوي وي.
