افغانستان کې د ملګرو ملتونو د سیاسي استاوزلۍ (یوناما) دفتر، د طالبانو تر واک لاندې افغانستان کې د بشري حقونو د وضعیت په اړه خپل نوي راپور کې ویلي، طالبانو په تېریو دریو میاشتو کې، په هېواد کې د خبریالانو نیولو او د رسنیو د فعالیت ځنډولو ته دوام ورکړی دی.
رخشانه: یوناما نن (سه شنبې د زمري ۶ مه) د روان میلادي کال د اپریل له لومړۍ نېټې د جون تر ۳۰ مې پورې، په افغانستان کې د بشري حقونو د وضعیت په اړه خپل راپور خپور کړی دی.
د ملګرو ملتونو د سیاسي استازولۍ د دفتر په راپور کې راغلي، طالبانو په دې موده کې، په خوست ولایت کې د یوې ځايي راډیو د خپرونو خپرېدو مخنیوی کړی او بامیانو کې یې د «باوري جواز نه درلودو» په خاطر د یوې ځايي راډیو دفتر مهرولاک کړی دی.
یوناما په خپل راپور کې ویلي، د طالبانو د اطلاعاتو او کلتور وزارت د جون په ۲۱ مه، د «راه فردا» خصوصي راډیو تلوېزیون د دفتر په تړلو سره، د دغې رسنۍ خپرونې د څو میاشتو لپاره بندې کړې.
دا بنسټ وايي، په تېرو دریو میاشتو کې، په کندهار او غزني ولایتونو کې لږ تر لږه اووه راډیوګانې، د مالي او د فعالیت د جواز د ستونزو له امله خپلې خپرونې بندې کړې وې.
یوناما وايي، طالبانو د می میاشتې په جریان کې په کابل کې درې خبریالان نیولي دي. د دې بنسټ په وینا، د دې ډلې استخباراتي ځواکونو د می په ۴ مه، کابل ښار کې د یوه خبري آژانس په دفتر چاپه وهلې او د دفتر توکي ضبط او کارکوونکي یې له ځان سره وړي دي.
د یوناما په راپور کې راغلي، طالب استخباراتي ځواکونو د می په ۷ مه، کابل ښار کې دوه تلوېزیوني راپور ورکوونکي نیولي او د یوه تلوېزیون دفتري وسایل یې هم کتلي دي. دا دوه خبریالان له شاوخوا ۲۰ ورځو وروسته، د طالبانو له زندان نه خوشي شول.
یوناما په خپل راپور کې، په هېواد کې پر مذهبي آزادیو د طالبانو محدودیتونو ته اشاره کړې وايي، دې ډلې په وروستیو دریو میاشتو کې، د بدخشان ولایت په زېباک، اشکاشم او واخان ولسوالیو کې د اسماعیله مذهب د پیروانو لږ تر لږه ۳۳ جماعت خونې، په جوماتونو بدلې کړې دي.
دې بنسټ ویلي، طالبانو د محرم په میاشت کې د هېواد په یو شمېر ولایتونو کې د عاشورا په مراسمو هم محدودیتونه لګولي وو. یوناما لیکلي، کابل کې د طالبانو د عدلیې وزرت کارکوونکو ۴۵ شیعه سړي، د عاشورا بیرغونو پورته کولو په تور یوه شپه بندیان کړل.
