افغانستان کې د روغتیا نړیوال سازمان په یوه راپور کې وايي، پر ښځینه کارکوونکو د طالبانو سختو محدودیتونو، د بودجې کمښت او د هممهاله بحرانونو فشارونو، افغانستان کې ښځو او ماشومانو ته د روغتیايي خدماتو وړاندې کول له جدي خنډونو سره مخ کړي دي.
رخشانه: دې سازمان نن (پنشنبې د زمري ۸ مه) په خپل کلني راپور کې خبرداری ورکړی، چې د ښځینه روغتیايي کارکوونکو پر فعالیتونو د طالبانو محدودیتونو او د بودجې کمښت، ناروغانو ته د خدماتو رسولو پروسه کمزورې کړې ده.
د روغتیا نړیوال سازمان په راپور کې راغلي، پر سفر، زده کړو او د ښځینه روغتیايي کارکونکو پر فعالیت د طالبانو محدودیتونه، د روغتیايي خدماتو په وړاندې کولو کې ګډوډي رامنځ ته کړې ده.
د روغتیا نړیوال سازمان ویلي، د ډاکتر او ښځینه روغتیايي کارکوونکو شدید کمښت، په ځانګړې توګه د افغانستان په لرې پرتو سیمو کې، د روغتیايي خدماتو کیفیت او حیاتي څارنو ته د ښځو او ماشومانو لاسرسی سخت کمزوری کړی دی.
راپور کې راوړل شوي، د بودجې کمښت په افغانستان کې د ۲۷ لومړنیو روغتیايي مرکزو د بندېدو سبب شوي او روغتیايي خدماتو ته یې د ۲۹۴ زره کسانو لاسرسی محدود کړی دی.
د راپور له مخې، د ښځینه کارکونکو پر فعالیتونو د طالبانو محدودیتونو او د بودیجې کمښت سربېره، د زلزلو رامنځ ته کېدو، وچکالۍ، سېلابونو، د ناروغیو خورېدو او له ایران او پاکستان ته د افغان کډوالو راستنېدو، د روغتیايي خدماتو د رسولو پروسه اغېزمنه کړې ده.
د روغتیا نړیوال سازمان په خپل راپور کې ویلي، دې محدودیتونو د طالبانو تر واک لاندې افغانستان په کمزوري روغتیايي سیستم فوق العاده فشار راوستی دی.
دا بنسټ وايي، د بودیجې کمښت د هغو ماشومانو لپاره چې د سختې خوارځواکۍ او پېچلتیاوو سره مخ دي، د داخل بستر واحدونو باندې هم سخت فشار راوړی دی.
راپور کې راوړل شوي، په ۲۰۲۵ کال کې په افغانستان کې د روغتیا نړیوال سازمان، سره له دې چې عملیاتي چاپېریال چټک بدلون کړی او د ټولنې اړتیاوې زیاتې شوې، بیا یې هم د دې هېواد په ۳۴ ولایتونو کې اړین او ژوند ژغورنکي روغتیايي خدمات وړاندې کړي دي.
په راپور کې ویل شوي، د لومړنی روغتیا ساتنې خوندیتوب د دې سازمان د فعالیتونو اصلي تمرکز پاتې شوی، ځکه چې کلېنیکونه، روغتونونه، بېړنۍ څانګې او ګرځنده ټیمونه، د ناروغانو د شمېر له زیاتوالي او د روغتیايي خدماتو ورځ تر بلې زیاتېدونکو غوښتنو سره مخ دي.
دې سازمان ویلي، چې د حادې خوراځواکۍ د درملنې ۱۴۱ بستر لرونکې څانګو په خوارځواکۍ د اخته او له روغتیايي اختلالاتو سره مخ ۵۶ زره او ۴۰۰ ماشومانو درملنه کړې او د رواني روغتیا خدماتو هم خپلې پراختیا ته دوام ورکړی دی، په داسې توګه چې د رواني روغتیا ملي روغتون او د ولایتونو په کچه د ناروغانو پنځو نویو څانګو له ۱۰۷ زره او ۵۳۳ زیاتو کسانو ته ځانګړي خدمات وړاندې کړي دي.
د روغتیا نړیوال سازمان ټینګار کړی، چې په فغانستان کې د روغتیايي خدماتو د دوام لپاره د ښځینه کارکوونکو پر فعالیتونو د طالبانو د محدودیتونو لغوه کولو او د دوامداره بودیجې برابرولو ته اړتیا ده.
