د سویلي افریقا د ښځو حقونو یو شمېر فعالانو، د طالبانو تر واک لاندې افغانستان کې د جنسیتي توپیر د په رسمیت پېژندلو په موخه کمپاین تر سره کړ.
رخشانه: دا کمپاین تازه او د اګست د نهمې په درشل «په سویلي افریقا کې د ښځو د ورځې» په مناسبت د Gauteng ANC» women’s league» له خوا د «جنسیتي توپیر ته پای ورکړی» کمپاین سره په همغږۍ تر سره شوی دی.
د سویلي افریقا د ښځو د حقونو فعالانو ویلي «د افغان ښځو او نجونو، چې په نړۍ کې د یوازیني جنسیتي توپیري نظام په وړاندې مقاومت کوي، تر څنګ په درېدو سره، د هغوی میراث ته درناوی کوي.»
دوی لیکلي، د جنسیتي توپیر د په رسمیت پېژندنې لباره د افغان ښځو او نجونو مبارزه، د ټولو ګډه ده او د سویلي افریقا ښځې د افغان ښځو تر څنګ درېږي.
د سویلي افریقا د ښځو حقونو فعالانو زیاته کړې «له نژادي توکمپالنې تر جنیستي توپیر پالنې پورې، پیوستون زموږ تر ټولو لوی ځواک پاتې دی.» دوی د آزادۍ، برابرۍ او عدالت غوښتنه کړې ده.
د ۱۹۲۶ میلادي کال د اګست نهمه، د سویلي افریقا پلازمېنه پرتوریا کې له ۲۰ زره څخه زیاتو ښځو د اپارتاید د دورې د تبعیضي ترافیکي قوانینو پر ضد لاریون وکړ. له همدې ورځې راهیسې د اګست ۹ مه په سویلي افریقا کې د ښځو د ورځې په توګه لمانځل کېږي.
طالبانو پر هېواد په خپله پنځه کلنه واکمنۍ کې، د ښځو د اساسي آزادیو او حقونو په وړاندې لسګونه فرمانونه صادر کړي او هغوی یې کار، زده کړې او ټولنیزو او سیاسي فعالیتونو ته له لاسرسي بې برخې کړې دي.
د بشري او ښځو د حقونو فعالانو، افغانستان کې د ښځو په وړاندې د طالبانو محدودیتونه «جنستي توپیر» بللی او د هغې په رسمیت پېژندلو غوښتنه کوي.
