د بشري حقونو فعالې او د نوبل جایزې تر ټولو ځوانې ګټونکې ملالې یوسفزی او یو شمېر افغان ښځینه فعالانو، د سویلي افریقا له ولسمشر سیریل رامافوزار سره په لیدنه کې، په افغانستان کې د طالبانو د «جنسیتي توپیر» نظام سره د مقابلې پر اړتیا ټينګار وکړ.
رخشانه: ملالې یوسفزی، یو شمېر افغان ښځینه فعالانو او د سویلي افریقا ولسمشر پرون یکشنبې د (زمري ۱۸ مه) د اګست نهمې «سویلي افریقا کې د ښځو ورځې» په مناسبت» په «د ګائیوتنګ ولایت په تشوانه» ښار کې سره ولیدل.
په دغه لیدنه کې ملالې یوسفزۍ او افغان ښځینه فعالانو، په افغانستان کې د طالبانو «د جنسیتي توپیر» نظام سره د بېړنۍ مقابلې پر اړتیا ټینګار وکړ.
دوی همدارنګه ټینګار وکړ، چې د افغان ښځو غږ باید د عدالت او ځواب وینې لپاره د نړیوالو هڅو په محور کې ځای کړای شي.
د بشري حقونو فعالې ملالې یوسفزۍ هم له افغان ښځینه فعالانو سره د سویلي افریقا د ولسمشر د لیدنې ستاینه وکړه او ویې ویل له « افغان ښځو سره د هغه له خواخوږۍ او درنښت» څخه منندوی یم.
یوسفزۍ پر خپله اېکس پاڼه افغان ښځې د هغه مشرانو په توګه یادې کړې، چې «د بشریت په وړاندې د جرم په توګه د جنسیتي توپیر د پېژندلو لپاره د هڅو رهبري کوي.»
د ملالې بنسټ همکارۍ ګیسو یاري هم پر خپله اېکس پاڼه، د سویلي افریقا له ولسمشر سره له لیدنې خوښي څرګنده کړې او لیکلی یې دي «یوه تمه شتون لري او هغه له سویلي افریقا راځي»
هغه پر ښځو د طالبانو پراخو محدودیتونو او پر افغانستان د دې ډلې پنځه کلنۍ واکمنۍ ته په اشارې ټینګار وکړ، چې د سویلي افریقا مشرتابه په نړیوالو هڅو کې د عدالت د تامین او په ټوله نړۍ کې د جنسیتي توپير د رسمیت پېژندلو په برخه کې مهم رول لري.
نوموړې یو ځل بیا په تېرو پنځو کلونو کې پر افغان ښځو او نجونو د طالبانو پراخو محدودیتونو ته اشاره کړې وايي، افغان مېرمنې له دې وروسته یوازې نه دي.
طالبانو د تېرو پنځو کلونو په اوږدو کې د سختو او سیستماتیکو محدودیتونو په لګولو سره، ښځې او نجونې له خپلو تر ټولو لومړنیو حقونو بې برخې کړې دي.
دغه ډله په افغانستان کې د ښځو او نجونو په وړاندې د لسګونو فرمانونو په صادرولو او پراخو او سیستماتیک محدودیتونو په لګولو سره، د «جنسیتي توپیر» پر بنسټ ولاړ نظام په رامنځ ته کولو او بنسټیز کولو تورنه ده.
د ښځو او بشري حقونو سازمانونه، د نړیوال جرم په توګه د جنسیتي توپیر په رسمیت پېژندلو او د نړیوالو حقونو په چوکاټ کې د هغو د عاملینو د ځواب ویلو غوښتونکې دي.
