د اګست پنځلسمه، پر افغانستان د طالبانو د واکمنۍ د پنځمې کلیزې په درشل کې، د ملګرو ملتونو عملي، کلتوري او ښوونیز سازمان (یونسکو) ویلي، په دې موده کې شاوخوا ۲.۴ میلیونه افغان نجونې، په هېواد کې له زده کړو بې برخې کړای شوې دي.
رخشانه: یونسکو پرون ناوخته سه شنبې د (زمري ۲۰ مه) په یوه راپور کې لیکلي، افغان ښځې له ۲۰۲۲ کال راهیسې په پوهنتونونو کې له زده کړو راګرځول شوې او همدارنګه د کار او ټولنیز ژوند کې د ګډون لپاره له سختو محدودیتونو سره مخ دي.
د یونسکو په راپور کې راغلي، په هېواد کې د نجونو په زده کړو د طالبانو محدودیتونه د ښځونیزو فرصتونو د پراخولو په برخه کې د کلونو پرمختګونه درولي دي.
دې بنسټ زیاته کړې: «په ۲۰۰۱ کال کې د ګوتو په شمار نجونو په لومړنیو زده کړو کې شتون درلود، خو تر ۲۰۲۱ پورې کابو یو میلیون نجونو په منځنیو ښوونځیو کې زده کړې کولې.»
یونسکو لیکلي دي «د دې فرصتونو له لاسه تلو پراخې پایلې درلودې، نه یوازې د افرادو په راتلونکې، بلکې د افغانستان په ټولنیزه او اقتصادي پراختیا یې هم اغېز کړی دی.»
د ملګرو ملتونو علمي، کلتوري او ښوونیز سازمان، په هېواد کې د ښخو او نجونو د زده کړو ملاتړ ته ځان ژمن وباله وايي، «له دې محدودیتونو سره سره، لا هم هڅه کوي، چې زده کړې هېڅ وخت ونه درېږي.»
دې بنسټ ویلي، د سوادي زده کړو پروګرامونو، مهارتونو پراختیا او د ټولنې پر بنسټ د رواني – ټولنیز ملاتړ له لارې بديل ښوونیز فرصتونه چمتو کوي.
یونسکو ویلي، دوی به د افغان نجونو او ښځو ملاتړ او دغه راز د دوی د زده کړې حق د بېرته تر لاسه کولو حق هڅو ته دوام ورکړي او په ورته وخت به، د شته محدودیتونو سره سره د دوی د زده کړې د دوام لپاره هرې ممکنه لارې ته پراختیا ورکړي.
