پر هېواد د طالبانو د واکمنۍ د پنځمې کلیزې په درشل کې، په افغانستان کې د ملګرو ملتونو د سیاسي استازولۍ (یوناما) دفتر وايي، پر ښځو او نجونو د طالبانو سخت محدودیتونه د بیارغونې او په نړیواله ټولنه کې د افغانستان د منل کېدو په وړاندې خنډ دی.
رخشانه: دې بنسټ نن (پنشنبې د زمري ۲۲ مه) د یوې اعلامیې په خپرولو سره ویلي، پر ښځو د طالبانو د محدودیتونو سربېره، له ترهګرۍ دوامداره اندېښنې او له ګاونډیوهېوادونو سره د دې ډلې نښتې «په نړیواله ټولنه کې د مدغم کېدو او نړیوالو تړونونو ته د ژمن پاتې کېدو په وړاندې خنډ دي.»
د ملګرو ملتونو د سیاسي استاوزلۍ دفتر وايي، د ۲۰۲۱ له اګست را په دېخوا یې له طالبانو سره خپل تعامل ته دوام ورکړی او د بشري مرستو، اساسي خدماتو، په سیاسي حوزو کې د فعالیت اوبشري حقونو په وړاندې کولو سره د افغانستان له خلکو ملاتړ کړی دی.
د افغانستان لپاره د ملګرو ملتونو د سرمنشي د ځانګړي استازي مرستیال او د یوناما سرپرست جورجیټ ګانیون وايي، تېرو پنځو کلونو وښوده، چې د افغانستان خلک له لسیزو جګړو وروسته، سولې او ثبات ته ډېر ارزښت ورکوي.
هغه زیاته کړې «خو تل پاتې سوله او هوساینه یوازې د جګړې په نشتوالي نه رامنځ ته کېږي، د افغانستان راتلونکې د یوې داسې ټولنې په رامنځ ته کولو تړلې، چې په کې د ټولو وګړو حقونه او وړتیاوې تحقق ومومي او بنسټونه مسوول او ځواب ویوونکي وي.»
افغانستان کې د یوناما سرپرست ویلي، طالبان باید پر ښځو او نجونو لګول شوي بندیزونه لرې کړي، تر څو هغوی وکولی شي، په زده کړو، کار او ژوند کې بشپړ ګډون ورلري، خپل بنسټیز حقونه او اساسي خپلواکۍ وساتلی شي.
یوناما لیکلي د ښخو او نجونو پر حقونو د طالبانو پراخو محدودیتونو لا هم ژورې ټولنیزې او اقتصادي پایلې له ځان سره لري او د افغانستان خلکو ته بېړني او اوږدمهالي زیانونه اړوي.
دغه بنسټ ویلي، د طالبانو پر مدني فضا، د بیان آزادۍ، په نړیوالو بنسټونو کې د ښځو فعالیت محدودیتونه، د افغانستان هغه فرصتونه محدودوي، چې له نړیوال ملاتړ او همکارۍ څخه په بشپړه توګه ګټه پورته کړي.
یوناما وايي، ترهګرۍ پورې تړلو اندېښنو له ګاونډیو هېوادونو او نړیوالې ټولنې سره د افغانستان اړیکې پېچلې کړې او تل پاتي ثبات ته رسېدو لپاره د نړیوالې ټولنې پراخې ښکېلتیا ته اړتیا ده، تر څو هغه بنسټیز خطرونه په نښه کړي، چې افغانستان او سیمې اوږدمهاله ثبات ګواښي.
د ملګرو ملتونو د سیاسي استازولۍ دفتر له نړیوالې ټولنې غوښتي چې «خپل اصول محوره او عملي تعامل» وساتي او د افغانستان د اودږمهاله پرمختګ او ادغام لپاره یوه هر اړخیزه تګلاره مخ ته یوسي.
