د اګست پنځلسمې، پر هېود د طالبانو د واکمنۍ له پنځمې کلیزې سره هممهاله، د افغانستان د چارو لپاره د برېتانیا ځانګړي استازي ویلي، له طالبانو یې غوښتي، چې د افغان ښځو او نجونو حقونو ته درناوی وکړي.
رخشانه: لیندسي نن (شنبې د زمري ۲۴ مه) په خپله اېکس پاڼه لیکلي، د افغانستان د خلکو راتلونکې د برېتانیا لپاره اهمیت لري.
هغه ویلي، افغانستان ته د څو سفرونو په ترڅ کې یې له طالبانو سره د افغانستان لپاره د برېتانیا د مهمو لومړیتوبونو په اړه خبرې کړې دي.
لیندسي له دې ډلې غوښتي، چې له ترهګرۍ سره د مبارزې، د سیمه ییزو امنیتي ګواښونو سره د مقابلې او د ښځو او نجونو د حقونو د درناوي په برخه کې پر خپلو ژمنو عمل وکړي.
د افغانستان د چارو لپاره د برېتانیا ځانګړي استازي ویلي، افغانستان ته د خپلو سفرونو په ترڅ کې یې «له صنعت کارانو، متشبثینو، د راډیو چلوونکو او مدني ټولنې له شخصیتونو» زده کړه کړې ده.
ریچارد لیندسي، د افغانانو مېلمه پالنه وستایله او د راتلونکې لپاره یې د «افغان وګړو هوډ او اراده» خورا مهمه وبلله.
هغه ټينګار وکړ، چې لندن کې یې هم په وار وار له افغان فعالانو، د مرسته کوونکو بنسټونو له کارکوونکو او د افغانستان د کرکټ له ښځینه پناه غوښتونکو سره لیدلي او خبرې اترې یې ورسره کړې دي.
لیندسي وايي، افغانستان له لویو ننګونو سره مخ دی. هغه ټینګار وکړ، چې برېتانیا په افغانستان کې د یوه پراخ بنسټه حکومت او غوړېدلې راتلونکې لپاره هڅې کوي.
