د کابل لوېدیځ دشت برچي سیمه کې ځايي سرچینې وايي، له تېرو څلورو ورځو راهیسې، لسګونه تنه، چې ډېری یې ماشومان دي، په دې سیمه کې مسموم شوي دي.
رخشانه: دشت برچي کې لږ تر لږه شپږو سرچینو رخشانې رسنۍ ته ویلي، د «عرفاني ښارګوټي، ولیعصر ښارګوټي، بیست متره او قلعه نو» سیمو اوسېدونکو د سردردۍ، تبې، اسهال او کانګو له نښو سره روغتیايي مرکزونو ته مراجعه کړې ده.
د سیمې یو تن اوسېدونکي رخشانې رسنۍ ته ویلي، ناروغۍ یې لومړی مشره لور او ورپسې دوه زامن ونیول.
هغه زیاته کړې، درې واړه اولادونه یې څلور ورځې کېږي، چې نارغان دي او سره له دې، چې ډاکتر ته ورغلې او درمل یې خوړلي خو تر اوسه نه دي ښه شوي.
د دشت برچي قلعه نو کې یوې بلې سرچینې ویلي، له څو ورځو راهیسې یې درې اولادونه او پلار یې مسموم شوي دي.
د ده په وینا، د کورنۍ غړو یې مخکې معدني اوبه کارولې، خو څو ورځې وړاندې یې یوه ماشوم د ټانکر اوبه څښلې او وروسته له هغې یې اولادونه ناروغان شول.
هغه د خپلو اولادونو د مسمومېدو لامل د ټانکر اوبه وبللې.
د دشت برچي عرفاني ښارګوټي کې یوې بلې سرچینې رخشانې رسنۍ ته ویلي، د کورنۍ درې تنه غړي یې له تېرې یوې اوونۍ راهیسې ناروغ شوي دی.
د هغه په وینا، دوی تبه، زړه بدوالی، اسهال او کانګې لري او سره له دې، چې ډاکتر ته ورغلي او درمل یې اخیستي، خو تر اوسه نه دي ښه شوي.
دشت برچي کې څلورو نورو سرچینو د دې سیمې د اوسېدونکو د مسمومیت لامل د څښاک اوبه بللې دي.
د سرچینو په وینا، د عرفاني ښارګوټي، ولیعصر ښارګوټي او بیست متره سیمې اوسېدونکي د اوبو رسولو له ګډې شبکې کار اخلي.
خو تر اوسه هېڅ رسمي روغتیايي بنسټ دا نه ده تایید کړې، چې د څښاک اوبه دې د مسمومیت لامل وي.
سرچینو زیاته کړې، نن له غرمې مخکې د دشت برچي له عرفاني ښارګوټي، ولیعصر ښارګوټي، بیست متره او قلعه نو څخه له ۱۰ زیات امبولانسونه د تګ راتګ په حال کې و او ناروغان چې ډېری یې ماشومان دي، روغتونونو ته لېږدوي.
د سرچینو په وینا، روغتیايي ډلې د ناروغانو د وضعیت د څېړلو او د مسمومیت د د علت د تشخص لپاره د دې سیمو جوماتونو ته ورغلي او هغه ناروغان چې وضعیت یې نازک دی، په ګوته کوي او روغتونونو ته یې لېږدوي.
یوه روغتیاپال چې ناروغان یې معاینه کړي وايي، د مراجعینو تر منځ د غذايي مسمومیت نښې لیدل کېږي. هغه زیاته کړې، د مسمومیت د علت معلومولو لپاره دقیقې څېړنې روانې دي.
تر اوسه د مسموم شویو کسانو شمېر او د دې پېښې علت نه دی معلوم. د طالبانو روغتیايي مسوولینو هم تر اوسه د دشت برچي سیمې د اوسېدونکو د مسمومیت او د هغه د احتمالي علت په اړه څه نه دي ویلي.
