کابل کې سرچینې وايي، د یوې ماشومې نجلۍ، چې دوه ورځې وړاندې ورکه شوې وه، حلال کړای شوی جسد د کابل ښار د ۲۱ مې امنیتي حوزې اړوند سیمه کې موندل شوی دی.
رخشانه: دوو ځايي سرچینو ویلي، د دې ماشومې نجلۍ جسد پرون دوشنبې د (وږي ۹ مه) د کابل ښار د څرخي پله په سیمه کې موندل شوی دی.
د سرچینو په وینا، دا ماشومه نجلۍ پنځه کلنه او فاطمه نومېده.
سرچینو زیاته کړې، فاطمه د یوه بېوزله سړي لور ده او دوه ورځې وړاندې د ناپېژاندو کسانو له خوا تښتول شوې وه.
د سرچینو د خبرو له مخې، د دې ماشومې نجلۍ جسد د سیمې د اوسېدونکو له خوا په داسې حال کې موندل شویو چې د بدن ځینې غړي ترې ایستل شوي دي.
د دې ماشومې د کورنۍ غړو ویلي، له هېچا سره شخصي دښمني نه لري. دوی له طالباو غوښتي، چې د فاطمې د قتل عاملین وپېژني او ویې نیسي.
طالبانو تر اوسه په دې اړه څه نه دي ویلي.
د روانې اوونۍ د شنبې په ورځ هم هرات ولایت کې د یوې ماشومې نجلۍ، چې دوه ورځې وړاندې ورکه شوې وه، جسد، په یوه بوجۍ کې موندل شوی وو.
