نورستان کې ځايي سرچینې وايي، د دې ولایت نورګرام ولسوالۍ کې یوه ځوانه نجلۍ له نامحرم سړي سره د اړیکې لرلو په دلیل د خپلې کورنۍ د غړو له خوا وژل شوې ده.
رخشانه : نورستان کې دوو ځايي سرچینو د هویت پټ ساتلو سره رخشانې رسنۍ ته ویلي، دا پېښه نن (پشنبې د وږي ۱۲ مه) د نورګرام ولسوالۍ د «پري سو» په کلي کې رامنځ ته شوې ده.
د سرچینو په وینا، دې ځوانې نجلۍ ۱۷ کاله عمر درلود او د په ډزو سره وژل شوې ده.
سرچینو زیاته کړې دا ځوانه نجلۍ له یوه نامحرم سړي سره د تلېفوني اړیکې په تور د خپلې کورنۍ د غړو له خو وژل شوې.
معلومه نه ده، چې دا ځوانه نجلۍ د کوم ډول وسلې په ډوزو وژل شوې.
د نورستان نورګرام ولسوالۍ کې طالبانو ویلي، د دې پېښې په تړاو یې درې تنه، له هغې جملې د دې نجلۍ پلار نیول شوي دي.
له دې مخکې هم د هېواد په یو شمېر ولایتونو کې ځوانې نجونې د تلېفوني اړیکو، له نامحرم سره له واده بهر اړیکې او کور نه د تښتې په تورونو د کورنۍ د غړو له خوا وژل شوې دي.
د طالبانو تر بیا واک ته رسېدو وروسته په هېواد کې ناموسي وژنې، د دولتي، حقوقي او د ښځو د ملاتړو بنسټونو د نشتوالي له امله، بې مخینې زیاتې شوې دي.
