فرانسه کې افغان پاراتکواندو لوبغاړې زکیه خدادادي د ۲۰۲۶ کال د «ګرنډپري» پاراتکواندو نړوالو سیالیو کې د برونز مډال ګټونکې شوه.
رخشانه: دا سیالۍ پرون جمعه (د وږي ۱۳ مه) د سویلي کوریا «موجو» ښار کې ترسره شوې.
خدادادي په خپله انسټاګرام پاڼه د څو انځورونو په خپرولو سره د ۲۰۲۶ کال د «ګرنډپري» پاراتکواندو نړوالو سیالیو کې د ګډون او برونز مډال د ګټلو خبر ورکړی دی.
زکیه خدادادي د منفي ۴۷ کیلوګرامه وزن کې د دې سیالیو ډګر ته ښکته شوې وه.
هغې نیمه پایلوبه کې په یوې بریا او دوه ماتو له یوې بلې ترکي لوبغاړې سره، د دې سیالیو په درېیم پلاټفورم کې ودرېده او د برونز مډال یې وګاټه.
زکیه خدادادي څو میاشتې وړاندې د اروپا د ۲۰۲۶ کال په پاراتکواندو سیالیو کې د دویم ځل لپاره اتله شوه او د دې سیالیو د سروزرو مډال یې تر غاړه کړ.
خدادادي د تېر کال په پسرلي کې د برازیل د (Rio Open G2 2025) پاراتکواندوی آزدو سیالیو کې د برونز مډال ګټونکې شوې وه.
هغه لومړنۍ افغان لوبغاړې ده، چې د توکیو د ۲۰۲۰ په پارالمپیک سیالیو کې یې ګډون وکړ او د دې سیالیو د زړورې ښځې لقب یې خپل کړ.
خدادادي له دې مخکې د اروپا د پاراتکواندو سیالیو د اتلولۍ د سروزرو، د ۲۰۲۲ کال د نړیوالو لوبو د نړیوالې لویې جایزې په سیالیو کې د برونزو، په البانیا کې په نړیوالو سیالیو کې د سپینو زرو مډال او په ۲۰۱۶ کال کې د مصر په پاراتکواندو سیالیو کې د برونزو مډال په غاړه کړی دی.
دې لوبغاړې په افغانستان کې د ښځو د حقونو، په ځانګړې توګه د نجونو د زده کړو او سپورت د حقونو د ملاتړ لپاره د نړیوالې پارالمپیک کمېټې د ۲۰۲۵ کال د ښځو نړیوالې ورځې د نوې راټوکېدونکې مشرې جایزه وګټله.
طالبانو په افغانستان کې د نورو محدودیتونو سربېره، ښځې له سپورت نه هم محرومې کړې دي. دا ډله ښځینه لوبغاړې په رسمیت نه پېژني او د هېواد ټول ښځینه ملي لوبډلې یې منحل کړې دي.
