د هرات جبرییل ښارګوټي کې ځايي سرچینې وايي، طالب ځواکونو په دې ښارګوټي کې د ښځو لپاره د ځانګړي شوي «نګین» بازارګوټي لسګونه هټۍ د «هغوی خاوندانو په ګواښلو» سره مهرولاک کړې.
رخشانه:د هرات جبرییل ښارګوټي کې دریو سرچینو ویلي، په دې بازارګوټي کې شاوخوا دېرش هټۍ، چې د ښځو اړوندې وې، پرون شنبې د (وږي ۱۳ مه) ماسپښین مهال کابو دوه بجې مهرولاک شوې دي.
د سرچینو په وینا، دا هټۍ وروسته له هغې د طالبانو له خوا وتړل شوې، چې یوه کس د دغه بازارګوټي د ځمکې د ملکیت دعوا کړې ده.
سرچینو زیاته کړې، دغه کس د طالبانو له لسو زیاتو غړو سره دې بازارګوټي ته راغلی و او ښځینه پلورونکو ته یې امر وکړ، چې هټۍ یې بندې قلف کړي.
د سرچینو د خبرو له مخې، طالبانو هغه پلورونکې چې د خپلو هټیو د مهرولاک کولو په غبرګون کې یې مقاومت کاوه وګواښلې او ویې ویل، د سرغړونې په صورت کې به یې ونیسي.
سرچینو ټینګار کړی، طالبانو له ځان سره قلفونه هم راوړي و او پلورونکو مېرمنو ته یې و ویل، چې تر راتلونکې خبرتیا پورې د هټیو د پرانستو حق نه لري.
طالبانو ښځینه پلورونکو ته ویلي، وروسته به معلومه شي، چې هټۍ نړول کېږي او یا به یې وروسته، د هټیو اجارې دغه کس ته، چې د ملکیت دعوا یې کړې ورکول کېږي.
په دې وروستیو کې د «سیدحبیب» په نوم یو کس د جبرییل ښارګوټي د مرکز د ځینو برخو د ملکیت دعوا کړې ده. دا کس د هرات د پخواني والي سید حسین انوري له خپلوانو دی.
سرچینو زیاته کړې، دې کس له کوم معتبر سند پرته ادعا کړې، چې نه یوازې د دې بازارګوټي ځمکه، بلکې د جبرییل ښارګوټي ډېره سیمه، چې له ۵۰ جرېبه څخه زیاته ده، د ده اړوند ده.
تر اوسه ځايي طالب چارواکو په دې اړه څه نه دي ویلي.
