د ملګرو ملتونو د عمومي منشي ویاند اسټفان دوجاریک ویلي، د افغان ښځو او نجونو په وړاندې د طالبانو له تبعیضه ډکو سیاستونو داوم اندېښمنوونکی دی.
رخشانه: ملګرو ملتونو په یوه اعلامیه کې لیکلي، پر افغان ښځو او نجونو د طالبانو له تبعیض نه ډکو سیاستونو د هغوی د ژوند په ټولو اړخونو اغېز کوي.
د دې بنسټ ویاند ویلي، په عمومي ژوند، زده کړو او دېری کاري حوزو کې د ښځو او نجونو په بشپړ ګډون محدودیتونه د هغوی له اساسي حقونو سرغړونه ده.
دوجازیک ټينګار کړی، چې پر ښځو او نجونو د طالبانو محدودیتونه، د اقتصادي پراختیا، ثبات او په نړیواله ټولنه کې د افغانستان د بیا ادغام په وړاندې ستر خنډونه شمېرل کېږي.
نوموړي ویلي، یو کال کېږي، چې افغانستان کې د ملګرو ملتونو ښځینه کارکوونکې د دې بنسټ اړوند دفترونو او ودانیو ته له لاسرسي بې برخې دي.
دوجاریک وايي، دا محدودیتونه له نړیوالو حقونو له هغې جملې د ملګرو ملتونو له منشور سره په ټکر کې دي او د خپل ماموریت د تر سره کولو لپاره یې د دې سازمان وړتیا، د ژغورونکو مرستو وړاندې کول او د افغانستان خلکو ته د نورو مرستو، په داسې وخت کې چې اړتیاوې لا هم پراخه دي، کمزوري کوي.
د نوموړي په وینا، د ملګرو ملتونو د ټولو کارکوونکو لپاره زموږ د ماموریت تر سره کولو په پار، د دوی کار ځایونو ته بې خنډه لاسرسی او زیانمنو خلکو په ځانګړې توګه ښځو او نجونو ته د رسیدګۍ او ساتنې لپاره خوار مهم دي، په داسې حال کې، چې کلتوري ملاحظاتو ته درناوی کېږي.
د ملګرو ملتونو ویاند وايي، دا ډاډ تر لاسه کول چې ښځې کولی شي، ښځو او نجونو ته بشري مرستې او اړین خدمات وړاندې کړي، د اغېژمن او اصولو پر بنسټ غبرګون اړتیا ده.
ملګرو ملتونو له طالبانو غوښتي، چې د دوی اړوند ښځینه کارکوونکو باندې لګول شوي بندیزونه لرې او په ټول هېواد کې د ملګرو ملتونو دفترونو او ودانیو ته د دوی خوندي او بې خنډه لاسرسی ډاډمن کړي.
یاد بنسټ پر طالبانو دا غږ هم کړیو چې پر ښځو او نجونو ټول لګول شوي محدودیتونه لرې کړي او د افغان ټولنې په ټولو اړخونو کې د دوی د بشپړ، برابر او مانا لرونکي ګډون حق ته درناوی وکړي.
