د بشري حقونو څار ډلې د پاکستان د طبي شورا دې پرېکړې ته په غبرګون کې، چې افغان زده کوونکي د طب او ستوماتولوژۍ څخه باسي، ویلي، دا پرېکړه افغان د زده کوونکو نجونو زده کړې او امنیت ګواښي.
رخشانه: دې سازمان په یوه اعلامیه کې لیکلي دا اقدام د ټولو افغان محصلینو په ځانګړې توګه د محصلو نجونو لپاره د هغوی د ډاکتر کېدو فرصت د پای ته رسېدو په مانا دی.
د بشري حقونو څار ډلې ویلي، د پاکستان دولت دغه راز د پاکستان د طبي زده کړو بنسټونو ته امر کړی، چې د افغان زده کوونکو د جذب لړۍ ودروي.
د دې بنسټ په وینا، د لاهور «کېنګ ادوارډ» طبي پوهنتون، ۲۰ افغان زده کوونکو، له هغې جملې څلورو نجونو او د وروستي کال اوو زده کوونکو ته امر کړی، چې په ۲۴ ساعتونو کې د خپل خروج د مراحلو بشپړولو لپاره ورشي.
د پاکستان د بشري حقونو خپلواک کمېسیون هم اټکل کړی، چې د طب او ستوماتولوژۍ شاوخوا ۱۰۰ افغان محصلین د لاهور، له هغې جملې ۲۰ تر ۴۰ نجونې، ښايي د دې پرېکړې تر مستقیم اغېز لاندې راشي.
د بشري حقونو څار ډله وايي، پاکستان د «نړیوالو اقتصادي، ټولنیزو او کلتوري نړیوالو حقونو د تړون» غړو هېوادونو په توګه، مکلف دی، چې لوړو زده کړو ته لاسرسی د وړتیا او له تبیعض پرته تضمین کړي.
دې بنسټ ویلي، پاکستان د «جبري نه بېرته ستنولو» نړیوال اصل رعایت کولو ته باید ژمن وي، هغه اصل، چې هغو سیمو ته د افرادو په جبري توګه د بېرته ستنولو مخنیوی کوي، چېرې چې دوی د ځورونې، ربړونې یا نورو جدي مستند خطر سره مخ کوي.
د بشري حقونو د څار سازمان وايي، پاکستاني چارواکي باید، د طالبانو تر واک لاندې افغانستان ته د دې زده کوونکو د ستنولو امر لغوه کړي، د هغوی نوم لیکنه پیل کړي او د افغان زده کوونکو سره له تبعیض نه ډک د ممنوعیت چلند لغوه کړي.
دې بنسټ ټينګار کړي، چې د [پاکستان دولت مکلف دی] د هر زده کوونکي د خوندیتوب اړتیاوې په انفرادي ډول وارزوي او هغو کسانو ته خوندي سرپناه چمتو کړي، چې ورته اړتیا لري، په ځانګړې توګه هغه ښځینه زده کوونکو ته، چې د طالبانو د ځورونې له لوړ خطر سره مخ دي.
د بشري حقونو څار ډله وايي، د پاکستان دولت باید اجازه ورکړي، چې دا زده کوونکي خپل تحصیلات پای ته ورسوي.
د پاکستان طبي شورا په دې وروستیو کې امر کړی، چې د طب او غاښونو د څانګو ډول افغان زده کوونکي باید دا هېواد نور پرېږدي.
دا پرېکړه «د پاکستان له دولت سره د طالبانو د جګړې» له امله شوې ده.
تر اوسه معلومه نه ده، چې پاکستان کې د طب او غاښونو برخې د زده کوونکو برخلیک به څنګه شي.
