د «ښځو د حرکت شبکې» غړو په کابل کې د طالبانو له لوري د ښځو وروستیو نیونو ته په غبرګون کې ویلي، نیول د ځپلو د عادي کولو، وېرې او ښځو د غږ د غلي کولو بیانوونکې ده.
رخشانه: د دې اعتراضي غورځنګ غړو په یوه پرېکړه لیک کې د طالبانو له خوا د ښځو نیول تر ټولو په سختو ټکو غندلي دي.
د «ښځو د حرکت شبکې» غړو په پرېکړه لیک کې راغلي، د ښځو نیول که په هر نامه وي «یو غیر انساني او اندېښمنوونکی عمل دی او ښيي، چې د ځپلو د سیاست پر وړاندې ان تر ټولو اساسي انساني نظرونه هم په پام کې نه نیول کېږي.»
د دې اعتراضي غورځنګ غړو لیکلي: «موږ له دې ډېر اندېښمن یو، چې د [طالبانو له خوا] د ښځو نیول د ډېرو خلکو لپاره اوس په ورځني خبر بدل شوی دی.»
دوی د طالبانو له لوري د ښځو د نیولو پر دوام اندېښنه وښوده ویې ویل: «ټولنه ورو ورو له دې جرم سره روږدي کېږي. دا د ځپلو عادي کول په خپله یو ناورین دی.»
معترضو ښځو ټینګار کړی: «د ظلم په وړاندې چوپتیا امنیت نه راوړي، بلکې په ځپلو سره دا پیغام ورکوي، چې کولی شي ورځ له بلې ناوړه عمل وکړي.»
دوی له هېوادوالو غوښتي، چې د ښځو، د نیولو، ربړونې، ګواښلو، لادرکه کولو او ځپلو په وړاندې غلي نه شي.
معترضو ښځو له ملګرو ملتونو، د بشري حقونو له بنسټونو او نړیوالې ټولنې وغوښتل، چې په دې وروستیو کې په کابل کې د ښځو نیونې ژر او په بې پرې توګه وڅېړي.
د «ښځو د حرکت شبکې» د طالبانو له خوا د نیول شویو ښځو د ژر تر ژره خوشي کېدو غوښتنه وکړه.
دوی له نړیوالې ټولنې او ملګرو ملتونو غوښتي، چې له ټولنې د ښځو د حذفولو سیستماتیک سیاست په وړاندې روښانه، جدي او عملي دریځ ونیسي.
معترضې ښځې وايي، د طالبانو له خوا د افغان ښځو نیول کېدل نه باید په یوه «ورځنۍ عادي موضوع» باندې بدله شي، ځکه د طالبانو د دې عمل په وړاندې چوپتیا به د ځپلو زمینه لار برابره کړي.
د روانۍ اوونۍ په لومړیو کې ځینو رسنیو په کابل کې د طالبانو له خوا د یو شمېر ځوانو ښځو د نیولو خبرونه خپاره کړل.
د راپورنو له مخې، طالبانو د کابل ښار په تایمني سیمه کې د یوې امیندواره ښځې په ګډون شاوخوا اته ښځې ونیوې او له ځان سره یې بوتلې.
