افغان زده کړیاله او د امریکا د «فولبرایټ» بورسیې درلودونکې بېنظیر نورزاد، د خپل پناه غوښتنې له مرکې څو اوونۍ مخکې، د دې هېواد د کډوالو ادارې (ICE) د مامورینو له خوا نیول شوې ده.
رخشانه: د بېنظیر خپلوانو ویلي هغه پنشنبې د (تلې ۳۰ مه) ویرجینا ته د تګ پر مهال له «دیټرویټ» هوايي ډګر څخه د الوتنې په وخت کې، په هوايي ډګر کې نیول شوې ده.
دغه ۳۲ کلنه افغان زده کړیاله په ۲۰۲۱ کال کې په فولبرایټ بورسیه امریکا متحده ایالاتو ته تللې او په همغه کال یې د پناه غوښتنې غوښتنلیک وړاندې کړی وو.
د هغې د خپلوانو په وینا، د بېنظیر د پناه غوښتنې درخواست رد شوی نه و او د پناه غوښتنې مرکه یې په راتلونکو اونیو کې ټاکل شوې وه.
د خپرو شویو راپورونو له مخې، هغه د مشیګان ایالت د بتل کریک ښار کې، کانټي کالاهون اصلاحي او روزنیز مرکز ته لېږدول شوې ده.
تر اوسه د بېنظیر نورزاد د برخلیک او د ساتلو د کره ځای په اړه کوم خبر نشته.
په ورته وخت جلاوطنه هزاره شبکې د امریکا د کډوالو ادارې له خوا د نورزاد په نیونه اندېښنه ښودلې او د هغې د ژر تر ژره خوشي کېدو غوښتنه یې کړې ده.
دې بنسټ د امریکا له کډوالو ادارې غوښتي، چې د نورزاد د پناه غوښتنې دوسیه دې له پناه غوښتونکو د ملاتړ په برخه کې، د امریکا د نړیوالو ژمنو او محکمې د عادلانه او بشپړو اصولو سره سمه وڅېړي.
هزاره جلا وطنه شبکې ویلي، د طالبانو تر واک لاندې افغانستان ته، چې د بشري حقونو له سخت بحران سره مخ دی، د نورزاد ستنول کولی شي هغه له جدي ګواښونو سره مخ کړي.
