د «برابرۍ لپاره د افغان ښځو غورځنګ» غړو، د افغان ښځو او نجونو د انساني او اساسي حقونو د خوندیتوب لپاره د سوله ییزو مبارزو پر دوام د ټینګار تر څنګ له ملګرو ملتونو او دولتونو غوښتي، چې د افغان ښځو حقونه د سیاسي مصحلتونو قرباني نه کړي.
رخشانه: د دې غورځنګ غړو نن (سه شنبې د لړم ۱۲ مه) په یوه پرېکړه لیک کې د خپلو مبارزو پر دوام ټینګار کړی دی.
د «برابرۍ لپاره د افغان ښځو غورځنګ» په پرېکړه لیک کې راغلي «مدني مبارزې، د زده کړو او ښځو د آزادۍ حق، د یوه آزاد او عادلانه افغانستان بنسټ دی.»
د دې اعتراضي غورځنګ غړو ویلي، په تېرو څه باندې پنځو کلونو کې یې تل د طالبانو د محدودیتونو په وړاندې د خپل اعتراض غږ پورته کړی دی.
معترضو ښځو د افغان نجونو پر مخ د ښوونځیو او پوهنتونو د دروازو د ژر تر ژره پرانستل کېدو او د طالبانو له لوري پر زده کړو د محدودیتونو پای ته رسولو غوښتنه کړې ده.
همدارنګه دوی د ښځو په وړاندې د تبعیض د پای ته رسېدو او د زده کړو، کار، سیاسي ګډون او ټولنیز ژوند د برابرو حقونو د خوندیتوب غوښتنه هم کړې ده.
معترضو ښځو له ملګرو ملتونو او دولتونو غوښتي، چې د افغان ښځو حقونه د سیاسي مصلحتونو قرباني نه کړي او د عدالت، آزادۍ او انساني کرامت د خوندیتوب لپاره عملي ګامونه پورته کړي.
د «برابرۍ لپاره د افغان ښځو غورځنګ» غړو د افغان ښځو او نجونو د انساني حقونو د تر لاسه کولو لپاره د خپلو مبارزو پر دوام ټینګار کړی دی.
