د افغانستان د ښځو د فریاد اعتراضي غورځنګ د یوې اعلامیې په، خپرولو سره په کابل کې د طالبانو له لوري د نجونو او ښځو نیول غیرقانوني او ځپوونکی عمل وباله او هغه یې وغانده.
رخشانه: دغه اعتراضي غورځنګ د بې حجابۍ په تور د ښځو او نجونو نیول د بشر حقونو، فردي آزادۍ او انساني کرامت څخه ښکاره سرغړونه وبلله وايي، د طالبانو دغه اقدام هېڅ دیني مشروعیت، قانوني بنسټ او اخلاقي توجیه نه لري.
معترضو مېرمنو ویلي چې«د طالبانو له تریخ والي ډک او منځنۍ پېړۍ سیاستونو عملآ افغانستان د ۲۱ مې پېړۍ د ښځو لپاره په یوه لوی زندان بدل کړی دی.»
هغوی له ښځو سره د طالبانو چلند جنسیتي توپیر بللی وايي، د دغه ناورین پر وړاندې د نړیوالې ټولنې چوپ پاتې کېدل د ظلم او ځپلو د پیاوړتیا سره د ګډون په منا دی.
معترضو ښځو د طالبانو له لوري د نیول شویو مېرمنو په بېړنۍ او له قید او شرط پرته توګه د خوشي کېدو غوښتنه کړې ویلي یې دي، چې د دغه ډلې د امربالمعروف وزارت باید د نړیوالو بنسټونو له لوري په رسمي او حقوقي ډول تحریم کړای شي.
همدارز هغوی د بشري حقونو د ماتوونکو او جنسیتي توپیر د مرتکبینو په توګه د طالبانو ډلې په رسمیت پېژندنې غوښتنه کړې وايي، د دغه ډلې دوسیه باید د هاګ نړیوالې محکمې ته وړاندې شي.
په ورته وخت د خپلواکۍ پر لور د ښځو اعتراضي غورځنګ په کابل کې د طالبانو له لوري د ښځو او نجونو د نیولو د غندنې په ترڅ کې اعلان کړی، چې د طالبانو دغه اقدام په افغانستان کې د طالب کولو او په سیستماتیک ډول له ټولنې د ښخو له منځه وړل دي.
د یاد غورځنګ غړو نن ( دوشنبې د چنګاښ ۳۰ مه) د یوې اعلامیې په خپرولو سره ویلي دي، چې په کابل کې د طالبانو د امربالمعروف ځواکونو له خوا د ښځو او نجونو نیول په کلکو ټکو غندي.
د خپلواکۍ پر لور د ښځو اعتراضي غورځنګ ویلي، هغه ښځې چې یوازې د جامو اغوستلو د ډول، په ټولنه کې د شتون یا هم د ژوندانه لپاره د هڅو په دلیل نیول شوې، د ښځو ځپوونکو او توپیري سیاستونو قربانې شوې او دا د طالبانو د جنسیتي توپیر لرونکي نظام ماهیت په ګوته کوي.
د دې اعتراضي غورخنګ غړو د طالبانو د ډلې دغه اقدامات د بشري حقونو د بنسټیزه اصولو لکه د آزادۍ حق، انساني کرامت او برابرۍ چې په نړیوالو لاسوندونو، د بشري حقونو اعلامیه او د ښځو پر وړاندې د توپیر چلند د لرې کولو کنوانسیون (CEDAW) کې په رسمیت پېژندل شوي، ښکاره سرغړاوی بولي.
معترضو مېرمنو ویلي، نور د دغه ټولې چوپتیا، ظلمونو او ځپلو پر وړاندې زغم نه لري. هغوی له هېوادوالو غوښتي، چې د طالبانو د جنایتونو پر وړاندې بې پروا پاتې شي.
دوی له نړیوالې ټولنې، بشري حقونو له بنسټونو، ملګرو ملتونو او ټولو دولتونو غوښتي، چې د طالبانو د ښکاره جنسیتي توپير پر وړاندې ښکاره او پرېکنده دریځ ونیسي.
د خپلواکۍ پر لور د ښځو اعتراضي غورځنګ له نړیوالې ټولنې غوښتي، چې د دغه جنایت د درېدو لپاره پر طالبانو د حقوقي او دیپلواماتیک فشار راوړلو توکي وکاروي.
دغه راز هغوی له نړیوالې ټولنې دا غوښتنه هم کړې، چې د افغانستان له ښخو په ځانګړې توګه له ښځنیه حقوقي فعالانو چې له ګواښ سره مخ دي سیاسي او حقوقي ملاتړ وکړي او هغوی ته پناه ورکړي.
په ورته وخت کې د طالبانو پر مشرانو او دغه ډلې پر غړو د هدفي بندیزو، سفر د بندېدا، په افغانستان کې د بشري حقونو د ښځنیه مدافعینو، ښځینه فعالانو او د جنسي او جنسیتي توپیر د تاوتریخوالي د قربانیانو د نړیوال ملاتر لپاره د کړنلارو رامنځ ته کول د معترضه مېرمنو بله غوښتنه ده.
د افغانستان د ښځو فریاد د اعتراضي غورخنګ غړو تر هغه چې د ښځو بنسټیز حقونه تضمین او د جنسیت تبعیض پالیسۍ په بشپړه توګه پای ته نه وي رسېدلې، طالبانو ته د مشروعیت ورکولو له هر ډول خبرو اترو څخه د بېړنۍ درولو غوښتنه هم کړې ده.
