فراه کې ځايي طالب چارواکي وايي، د دې ولایت «بکوا» ولسوالۍ کې د هاوان د یوې پخوانۍ مرمۍ د چاودنې له امله څلورو ماشومانو ژوند له لاسه ورکړی او دوه نور ماشومان ټپیان شوي دي.
رخشانه: فراه کې د طالبانو د امنیه قوماندانۍ ویاند کلیم الله ننګیال وايي، دا پېښه نن جمعه د (لړم ۲۹ مه) له ماسپښین وروسته، د بکوا ولسوالۍ په شاګي کلي کې رامنځ ته شوې ده.
د نوموړي په وینا، د هاوان دې پخوانۍ مرمۍ هغه مهال چاودنه کړې، چې د یوې دیني مدرسې زده کوونکو هغه له ځان سره مدرسې ته د ننه وړې وه.
ده زیاته کړې، د دې مرمۍ د چاودنې له امله څلور ماشومان وژل شوي او دوه تنه نور ټپیان شوي دي.
فراه کې د طالبانو د امنیه قوماندانۍ ویاند وايي، دې ماشومانو د ۱۰ تر ۱۶ کلونو عمر درلود.
د یادې پېښې د ټپیانو روغتیايي وضعیت د ډاډ وړ ښودلی شوی دی.
تېره اوونۍ هم غزني ولایت کې د یوې پخوانۍ ناچاودې مرمۍ د چاودنې له امله یوې ښځې او یوه ماشوم ژوند بایللی وو.
د ملګرو ملتونو د بشري مرستو د همغږۍ دفتر د شمېرو له امله، افغانستان کې د ناچاودو توکو د چاودنو ۸۷ سلنه قربانیان ماشومان جوړوي.
د پخوانیو جګړو د پاتې شوني ناچاودي توګي لا هم په هېواد کې د خلکو په ځانګړې توګه د ماشومانو ورځنی ګواښ بلل کېږي.







