د بې پولې ډاکترانو سازمان (MSF) په هېواد کې په خوارځواکۍ د اخته ماشومانو د شمېر زیاتوالي په اړه خبرداری ورکړی او اعلان یې کړی، چې په خوارځواکۍ د اخته ماشومانو په شمېر کې ۲۸.۷۴ سلنه زیاتوالی راغلی دی.
رخشانه: دې سازمان نن (پنشنبې د لړم ۲۸ مه) په خپله فسبوک پاڼه د یوې خبرپاڼې په خپرولو سره لیکلي، په «سخته خوارځواکۍ» د اخته ماشومانو شمېر لا هم لوړ دی.
د بې پولې ډاکترانو سازمان په وینا، «معمولا د اوړي له فصل وروسته، د خوارځواکۍ د سخته پېښو شمېر کموالی کوي، خو سږ کال یې شمېر زیات شوی دی.
په اعلامیه کې راغلي، د روان میلادي کال د جنورۍ او اګست میاشتو تر منځ موده کې د دې بنسټ ګرځنده ټیمونو په سخته خوارځواکۍ اخته ۸ زره او ۴۸۷ ماشومان بستر دي، چې د تېر کال د ورته مودې په پرتله ۲۸.۷۴ سلنه زیاتوالی ښيي.
افغانستان کې د بې پولې خبریالانو سازمان د طبي فعالیتونو همغږې کوونکې انا باندا ویلي، په افغانستان په خوارځواکۍ اخته ګڼ ماشومان درملنې ته اړتیا لري، خو د روغتونونو خدمات په یوازې ځان د تل پاتې ښه کېدو لپاره د ډاډ وړ نه دي.
د باندا په وینا، افغانستان کې ډېری کورنۍ کافي خوړو ته د لاسرسي په برخه کې له ستونزو سره مخ دي.
د بې پولې خبریالانو سازمان ټینګار کړی، چې بېوزلۍ، د روغتیايي مرکزونو لرې والي، د تګ راتګ محدودیتونو، د غذاي توکو کمښت او د روغتیايي مرکزونو تړل کېدل کولی شي د کورنیو لپاره د روغتیايي خدماتو دوام ننګونکی کړي.
نړیوالو روغتیايي بنسټونو په وار وار د طالبانو تر واک لاندې افغانستان کې په خوارځواکۍ د اخته ماشومانو د شمېر زیاتوالي په اړه خبرداری ورکړی او له نړیوالې تولنې یې دې وضعیت ته د رسیدګۍ غوښتنه کړې ده.







