دوه باخبره سرچینو رخشانې رسنۍ ته وايي، مدني او د بشري حقونو فعال احمد مجتبی محمدي، چې یوه نیمه میاشت وړاندې د طالبانو د استخباراتو له خوا نیول شوی وو، په زندان کې د دې ډلې تر «سختې» شکنجې لاندې دی.
رخشانه: باخبره سرچنیو ویلي، دغه مدي او د بشري حقونو فعال د روان کال د وږي په ۲ مه له ایران څخه تر راایستل کېدو وروسته، د طالبانو استخباراتو د پروان ولایت د مرکز بایان علیا سیمه کې له خپل کور څخه ونیوه او زنداني شو.
د احمد مجتبی محمدي د خپلوانو یوې سرچینې د هویت پټ ساتلو سره ویلي: «مجتبی احمدي له هغې ورځې چې د ایران څخه راستون شوی، په زندان کې دی او یوه نیمه میاشت کېږي، چې له طالبانو سره تر شکنجو لاندې دی.»
هغه زیاته کړې، چې د ښاغلي احمدي مېرمن له دوه کوچینیو زامنو سره، په بې سرپرستۍ کې ژوند تېروي او د طالبانو له زندان څخه د خپل خاوند د خلاصون لپاره د بشري حقونو له بنسټونو د مرستې غوښتنه کوي.
یوې بلې سرچینې د محتبی احمدي د نیول کېدو د پخلي تر څنګ وايي، ښاغلي احمدي د جمهوریت په دوران کې مدني فعالیت کاوه او د طالبانو په لاس د افغانستان له سقوط وروسته، د امنیتي ستونزو له امله ایران ته کډوال شو او په دې هېواد کې هم د طالبانو پر ضد اعتراضونو کې فعال وو.
سرچینې زیاته کړې، دغه مدني فعال په زندان کې تر شکنجو لاندې دی تر څو په زور اعتراف وکړي: «مجتبی تر شکنجې لاندې دی، چې رییس مو راوښیه، په کوم هېواد کې دی او د خپلې ډلې غړي راوښیه.»
پاکستان او ایران سږ کال د افغان کډوالو ایستلو ته کار ویلی وو. د ملګرو ملتونو د شمېر پر بنسټ له دې دواړو هېوادونو له ۲.۳ میلیونه زیات افغان کډوال ایستل شوي او افغانستان ته رالېږل شوي دي. په ایستل شویو کسانو کې هغه کسان هم شته، چې ځان یې په افغانستان کې له ګواښ سره مخ دی.
په افغانستان کې د ملګرو ملتونو سیاسي استازولۍ (یوناما) هم مخکې اعلان کړی وو، چې له ایران او پاکستان څخه را ایستل شوي یو شمېر پخواني نظامیان، خبریالان، مدني فعالان، ښځې او ماشومان د طالبانو له لوري نیول شوي او زنداني شوي دي.
د یوناما په راپور کې راغلي، د مخکني نظام کارکوونکي او امنیتي ځواکونه هېواد ته له راستنېدو وروسته، د طالبانو د ځورولو او ازارولو له وېرې اړ دي، چې په پټه ژوند تېر کړي.
دغه راز یوناما ټينګار کړی، چې طالبان په خپلو زندانونو کې له شکنجې د تحقیق د توکو په توګه کار اخلي.
