په ملګرو ملتونو کې د افغانستان د دایمي استازولۍ سرپرست نصیراحمد فایق، هېواد کې د بشري حقونو د وضعیت په اړه ویلي «افغانستان نن د بشري د یو له سختو ناورینونو په مرکز کې دی.»
رخشانه: فایق پرون ناوخته (جمعه د لړم ۹ مه) د هغه بیانیې د متن په خپرولو سره چې د ملګرو ملتونو په اتیایمه ناسته کې یې وړاندې کړی پر خپله اېکس پاڼه لیکلي، طالبانو د پراخو محدودیتونو په لګولو سره، د انسانو له اساسي حقونو د ملاتړ لارې چارې له منځه وړې دي.
هغه په خپله بیانیه کې د افغانستان د بشري حقونو لپاره د ملګرو ملتونو د ځانګړي راپور ورکوونکي ریچارد بنټ د راپور وړاندې کولو ستاینه کړې وايي، د بنټ راپور «د طالبانو تر واک لاندې [افغانستان کې] زموږ د خلکو د ژوند د واقعیتونو یوه روښانې، جامع او ژورې اندېښنې انځور وړاندې کوي.»
فایق په افغانستان کې د طالبانو له لوري د ښځو او نجونو د اساسي حقونو او خپلواکۍ پر وړاندې پراخ محدودیتونه «د حذف او سلطې قصدي سیاست» بللی چې دغه ډله یې «له دین او کلتور څخه په تحریف تفسیرونو» هغه توجیه کوي.
هغه د بنټ د راپور په استناد ویلي، دغه راپور په سیمه توګه د طالبانو تر واک لاندې افغانستان کې د «ځورولو او جنسیتي توپير» مستند کړی او وايي، په عام محضر کې په دورو وهل او اعدام، د پخوانیو نظامیانو، خبریالانوو، مدني فعالانو او د دې ډلې د مخالفینو، ربړونه او غچ اخیستنه، د وېرې او ډارولو د رامنځ ته کولو په موخه ډیزاین شوي دي.
فایق په خپله بیانیه کې په هېواد کې «د زده کړو مدرسه محوره کېدل» د اندېښنې وړ بللي لیکلي یې دي «طالبانو ښوونځي د ایډیولوژیک تبلیغ په مرکزونو بدل کړي او ډېر لږ دیني زده کړې یې د عصري او سکولار تعلیماتو ځای ناستي کړي دي.»
هغه پر دوام وايي «د طالبانو تر واک لاندې افغانستان کې د هزاره ګانو، شیعه ګانو او اسماعیله مذهب لارویانو کړاو» ورځ تر بلې ژورېږي او دغه قومي او مذهبي ډلې، له منظم توپیري چلند، په زور کډوالۍ او موخه لرونکي تاوتریخوالي سره مخ دي.
په ملګرو ملتونو کې د افغانستان د دایمي استازولۍ سرپرست ټینګار کړیو چې د ښځو تر سرپرستۍ لاندې میلیونونه کورنۍ مخ پر زیاتېدونکې لوږې سره لاس او کرېوان دي، اقتصاد او ټولنیز خدمات هم په افغانستان کې کابو له منځه تللي دي.
هغه له ګاونډیو هېوادونو د افغان کډوالو ایستلو ته اشاره کړې او له دې هېوادونو یې غوښتي، چې له ګواښ سره مخ کسانو د نه ستنولو اصل ته ژمن پاتې شي او افغانستان ته د هغوی له لېږلو ډډه وکړي.
فایق د طالبانو د لوړ پوړو چارواکو د نیولو حکم صادرولو او په افغانستان کې د بشري حقونو د سرغړونو د څېړلو لپاره د خپلواکې کړنلارې رامنځ ته کېدو هرکلی کړی او له نړیوالې ټولنې یې غوښتي، چې له طالبانو سره خپلې اړیکې عادي نه کړي.
په ملګرو ملتونو کې د افغانستان د دایمي استازولۍ سرپرست له نړیوالې ټولنې غوښتي، چې د افغانستان له خلکو په ځانګړې توګه له ښځو او نجونو «چې په پټه زده کړې کوي، د سرغړونو پېښې مستندوي او عدالت غواړي» ملاتړ وکړي.
