په افغانستان کې د ملګرو ملتونو له ماشومانو د ملاتړ صندوق (یونیسف» اعلان کړي، چې سږ کال یې له ۴۸۰ زره زیات، په سخته خوارځواکۍ اخته ماشومانو تر درملنې لاندې نیولي دي.
رخشانه: په افغانستان کې د یونیسف استازي ډاکتر تاج الدین ایوالي نن (شنبې د لړم ۱۰ مه) په خپله اېکس پاڼه د یوه پوسټ په خپرولو سره لیکلي، له لویو خنډونو سره سره، هره ورځ د انسانانو ژوند ژغورل کېږي.
هغه له خپلو ګډونوالو او مرسته کوونکو چې افغانستان کې د ماشومانو تر څنګ ولاړ دي، مننه کړې ده.
یونیسف تېره ورځ اعلان وکړ، چې افغانستان په نړۍ کې د خوارځواکۍ یو له سختو ناورینونو سره مخ دی.
د دې بنسټ په وینا، په افغانستان کې کابو ۳.۵ میلیونه ماشومان له حادې خوارځواکۍ سره لاس او ګرېوان دي، چې یو میلیون د هغوی سخت ډنګر او له ګواښ سره مخ دي.
یونیسف ویلي وو، چې دغه [وضعیت] د مخینوي وړ دی. اوږدمهاله بودجه او ښځینه روغتیايي کارکوونکو ته لاسرسی کولی شي د انسانانو ژوند وژغوري او د ماشومانو له راتلونکې ساتنه وکړي.
په افغانستان کې د خوړو نړیوال سازمان (WFP) هم څه موده وړاندې اعلان کړی وو، چې په افغانستان کې کابو ۴.۷ میلیونه ښځې او ماشومان په خوارځواکۍ اخته شوي دي.
دغه بنسټ ویلي وو، چې افغانستان کې ۹.۵ میلیونه وګړي د خوړو له سخت نه خوندیتوب سره مخ دي.
بهرنیو بنسټونو په وار وار خبرداری ورکړیو چې افغانستان د خوارځواکۍ له سخت ناورین سره لاس او ګرېوان دی.
له پاکستان او ایران څخه د کډوالو جبري ایستل، سخته وچکالۍ او د بشري مرستو سخت کموالي په هېواد کې دغه ناورین زیات کړی دی.
