بدخشان کې د طالبانو د عامې روغتیا ریاست چارواکي وايي، په تېرو ۱۱ میاشتو کې په دې ولایت کې ۱۶ زره ماشومان په خوارځواکۍ اخته شوي دي.
رخشانه: بدخشان کې د عامې روغتیا ریاست د تغذیې د څانګې مسوول جاوید محبي له ځايي رسنیو سره په خبرو اترو کې ویلي، د دې ماشومانو له ډلې، له ۶۰ تنو زیاتو هغو د خوارځواکۍ له امله ژوند له لاسه ورکړی دی.
هغه بېوزلي، بېکاري او کافي خوړو ته د کورنیو نه لاسرسي، بدخشان کې د خوارځواکۍ پېښو د زیاتېدو اصلي لامل بللی.
بدخشان کې د طالبانو د عامې روغتیا ریاست د تغذیې څانګې مسوول، همدارنګه زیاته کړې، چې د دې ولایت ډېری سیمې منظمو روغتیايي خدماتو ته لاسرسی نه لري.
په افغانستان کې د ملګرو ملتونو د خوړو نړیوال پروګرام (WFP) څه موده وړاندې په یوه راپور کې لیکلي وو، په افغانستان کې د خوړو د خوندیتوب وضعیت بحراني دی.
د دې بنسټ د راپور له مخې، په افغانستان کې ۱۷ میلیونه وګړي له سختې لوږې او کابو ۴ میلیونه ماشومان د خوارځواکۍ له ګواښ سره مخ دي.
د خوړو نړیوال پروګرام وړاندوینه کړې وه، چې د ماشومانو خوارځواکي به هم ښايي زیاته شي او راتلونکی کال به نېږدې څلور میلیونه ماشومان اغېزمن کړي.
یوناما هم څه موده وړاندې په یوه راپور کې ویلي وو، چې د خوړو نه خوندیتوب لا هم سخت دی، د ښځو او ماشومانو د خوارځواکۍ کچې کابو ۱۵ سلنه زیاتوالی کړی او په وړاندې ژمی میلیونونه کسان له مرستو پاتې شوي دي.
یوناما په افغانستان بشردوستانه وضعیت «خورا بحراني» بللی او ویلي یې وو، چې د مرستو رسولو لپاره د بودجې کمښت، د زرګونو کسانو په ځانګړې توګه د ښځو او ماشومانو ژوند ګواښي.
