د هرات انجیل ولسوالۍ کې پر غیرنظامي شیعه وګړو د شوي وسله وال برید د قربانیانو جسدونو خارولو ته سپارلو سره سم، د دې ولایت سلګونو اوسېدونکو د دې خونړۍ پېښې په غبرګون کې لاریون وکړ.
رخشانه: د دې قربانیانو جسدونه نن (سه شنبې د وري ۲۵ مه) د هرات ښار له صادقیه جومات په اوږو او د زرګونو کسانو په ګډون «سلطان آقا زیات» او د انجیل ولسوالۍ «ده میري» کلي کې خاورو ته وسپارل شول.
د اتو تنو جسدونه د سلطان آقا په هدیره کې او د دریو تنو په ده میري کلي کې خاورو ته وسپارل شول.
د هرات هغه اوسېدونکو چې د دې قربانیانو د جسدونو خاورو ته سپارلو مراسمو کې یې ګډون کړی وو، د «الله اکبر» او «لبیک یا حسین» «مرګ په منافق» او «مرګ په ترهګرو» شعارونو ورکولو سره په غیرنظامي شیعه وکړو د برید په غبرګون کې لاریون وکړ.
په هغه ویډیوګانو چې د قربانیانو خاورو ته د سپارلو مراسمو څخه په ټولنیزو شبکو خپرې شوې، لیدل کېږي، چې د طالبانو وسله وال کسان د لاریون پر مهال د کورنو په بامونو ولاړ دي.
په ورته وخت د هرات اوسېدونکو هم رخشانې رسنۍ ته ویلي، چې د طالبانو نظامي ځواکونه، له نن سهار راهیسې، په څلور لارو، اصلي او فرعي سړکونو په پراخه کچه ځای پر ځای شوي او د ښار په بېلا بېلو برخو کې ګزمې کوي.
د څلور زیاتو ورځو په تېرېدو سره، لا هم د هرات انجیل ولسوالۍ کې په غیرنظامي شیعه وګړو د برید مسوولیت تر اوسه هېڅ کس او وسله والو ډلې پر غاړه نه دی اخیستی.
طالبانو او یوناما د دې پېښې د قربانیانو شمېر ۱۱ تنه اعلان کړی او ویلي یې دي، چې اته تنه نور ټپیان شوي دي.
طالبانو ادعا کړې، چې د دغه برید په تړاو یې یو تن نیولی او د نورو وسله والو د نیولو لپاره هم هڅې روانې دي.
دې برید ګڼ غبرګونونه راپارولي دي. د طالبانو مخالفین، دا ډله د خلکو، په ځانګړې توګه د دیني او مذهبي لږکیو د امنیت په تامین کې ناتوانه بولي او باور لري، چې دا برید د طالبانو په همکارۍ تر سره شوی دی.
