کاپیسا کې سیمه ییز طالب چارواکو ویلي، د دې ولایت تګاب ولسوالۍ کې د جګړې مهال د پاتې شوي ماین چاودنه کې، یوه ماشوم ژوند له لاسه ورکړی دی.
رخشانه: کاپیسا کې د طالبانو د امنیه قوماندانۍ ویاند عبدالفتاح فائز سیمه ییزه رسنیو ته ویلي، دا پېښه پرون «دوشنبې د وري ۲۴ مه) د تګاب ولسوالۍ په «بدراب» سیمه کې رامنځ ته شوې ده.
د هغه په وینا، پېښه هغه مهال رامنځ ته شوې، چې یوې ماشومې نجلۍ یوه کړۍ ماین موندلی او پر هغې یې ګزار کړی دی.
فائز زیاته کړې، دا ماین د ګزار کولو له امله چاودلی او دې ماشومې نجلۍ په کې ژوند باللی دی.
د تېرې جګړې مهاله پاتې شوي ماینونه او ناچاودي توکي، تل د هېواد له وګړو په ځانګړې توګه له ماشومانو قرباني اخلي.
یوناما څه موده وړاندې په یوه راپور کې لیکلي، افغانستان کې د ماینونو او ناچاودو توکو د چاودنو ۸۰ سلنه قربانیان ماشومان دي.
د یوناما په وینا، افغانستان د چاودېدونکو توکو د چاودنو د مرګ ژوبلې له پلوه، په نړۍ کې درېیم هېواد دی.
