افغانستان کې د ملګرو ملتونو د بشري مرستو د همغږۍ دفتر (اوچا) وايي، هغه ښځې او نجونې چې افغانستان ته ستنېږي، له تر ټولو زیانمنونکو ډلو څخه دي.
رخشانه: دې بنسټ نن (پنشنبې د غوايي ۳ مه) په خپله اېکس پاڼه د یوې اعلامیې په خپرولو سره لیکلي، ډېری هغه ښځې او نجونې چې افغانستان ته ستنول کېږي، د طالبانو له محدودیتونو سره مخ کېږي.
اوچا لیکي: «ډېری د هغوی له هېڅ شي پرته رارسېږي او خدماتو، زده کړې، ژوند او ملاتړ ته له کم لاسرسي سره مخ کېږي.»
د ملګرو ملتونو د بشري مرستو د همغږۍ دفتر زیاته کړې «د دوی د بېړنیو اړتیاوو د پوره کولو لپاره بشري ملاتړ خورا مهم دی.»
دا بنسټ په داسې حال کې افغانستان ته د زیانمنونکو ښځو او نجونو په اړه اندېښنه ښيي، چې پاکستان د افغان کډوالو په ځانګړې توګه د ښځو او ماشومانو د ایستلو څپه ګړندۍ کړې ده.
د بشري حقونو څار ډلې پرون په یوه راپور کې لیکلي، پاکستان له طالبانو سره تر تازه جګړو وروسته، د افغان کډوالو د خپل سرو نیونو او په زور ایستلو لړۍ ګړندۍ کړې ده.
دې بنسټ ویلي، د پاکستاني پولیسو عملیات د دې لامل شوي، چې زرګونه افغان ګډوال، له هغې جملې ماشومان، روغتیايي خدماتو، زده کړې او نورو اساسي خدماتو ته د لاسرسي له جندي ننګونو سره مخ شي.
د بشري حقونو څار ډلې د پاکستان له خوا د افغان کډوالو په زور ایستل، د ربړونې په وړاندې د ملګرو ملتونو د کنوانسیو د یوه غړي په توګه د دې هېواد له کړیو ژمنو او دغه راز د نړیوال قانون له دې اصل نه چې «جبري ستنول» منع کوي، سرغړونه بللې ده.
