د «آزادۍ لپاره د افغان ښځو د یوالي غورځنګ» پاکستان کې د افغان کډوالو په وضعیت اندېښنه ښودلې او هغه یې «خراب» ښودلی دی.
رخشانه: د دې اعتراضي غورځنګ غړو نن (پنشنبې د غوايي ۳ مه) په یوه اعلامیه کې لیکلي، دا کډوال په ځانګړې توګه د بشري حقونو فعالان، خبریالان او پخواني نظامیان له امنیتي ګواښونو، رواني فشارونو، قانوني محدودیتونو له هغې جملې د وېزې د نوي کولو جدي ستونزو سره مخ دي.
معترضو ښځو ویلي، «دا کډوال خپل هېواد ته د خوندي ستنېدو امکان نه لري او له کافي ملاتړه برخمن هم نه دي.»
دوی له نړیوالې ټولنې او نړیوالو بنسټونو غوښتي، چې بېړني او ګټور ګامونه پورته کړي او د «د هغوی بیا مېشتېدنه کړنلاره ګړندۍ او بېړني ملاتړ» ورته برابر کاندي.
معترضو ښځو همدارنګه درېیمګړي هېواد ته د افغان پناه غوښتونکو په ځانګړې توګه د ښځو او ګواښ سره مخ افرادو د لېږد زمینې رامنځ ته کولو غوښتنه کړې ده.
هغوی خبرداری ورکړی، چې پاکستان کې د افغان کډوالو وضعیت ته نه پاملرنه کولی شي نه جبرانېدونکې پایلې له ځان سره ولري.
د آزادۍ لپاره د افغان ښځو د یووالي غورځنګ د دې بحران په اړه د نړیوالې ټولنې د بېړني اقدام پر کولو ټینګار کړی دی.
د بشري حقونو څار ډلې پرون په یوه راپور کې لیکلي، پاکستان له طالبانو سره تر تازه جګړو وروسته، د افغان کډوالو د خپل سرو نیونو او په زور ایستلو لړۍ ګړندۍ کړې ده.
دې بنسټ ویلي، د پاکستاني پولیسو عملیات د دې لامل شوي، چې زرګونه افغان ګډوال، له هغې جملې ماشومان، روغتیايي خدماتو، زده کړې او نورو اساسي خدماتو ته د لاسرسي له جندي ننګونو سره مخ شي.
د بشري حقونو څار ډلې د پاکستان له خوا د افغان کډوالو په زور ایستل، د ربړونې په وړاندې د ملګرو ملتونو د کنوانسیو د یوه غړي په توګه د دې هېواد له کړیو ژمنو سرغړونه بللې ده.
