د افغانستان لپاره د برېتانیا سفارت (UK For Afghanistan) اعلان کړي، چې د افغان ښځو پر زده کړه او کار د طالبانو محدودیتونه، د دې هېواد د ټولو وګړو راتلونکې له ګواښ سره مخ کوي.
رخشانه: دې سفارت پرون ناوخته (سه شنبې د غوايي ۸ مه) د یونیسف د راپور په خپرولو سره لیکلي، دا راپور «اندېښمنوونکی وو او د طالبانو د اوږد مهاله سیاستونو زیان څرګندوي.»
د افغانستان لپاره د برېتانیا سفارت یو ځل بیا د دې «لنډ فکره محدودیتونو» د لغوه کولو غوښتنه وکړه.
یونیسف پرون په یوه راپور کې ویلي، د افغان نجونو په زده کړه او ښځو پر کار د طالبانو محدودیتونه کولی شي، تر ۲۰۳۰ پورې دا هېواد د ۲۵ زره څخه زیاتو ښځینه ښوونکو او روغتیايي کارکوونکو له کمښت سر مخ کړي.
د یونیسف د «په افغانستان کې د نجونو د زده کړې او ښځو د کار ځواک د ګډون په اړه د بې کیفیتۍ لګښت» راپور کې رغلي وو، په ملکي خدماتو کې د ښځو ونډه په ۲۰۲۳ کال کې له ۲۱ سلنې په ۲۰۲۵ کال کې ۱۷.۷ سلنې ته راټيټه شوې ده.
دې بنسټ د دغه محدودیتونو د دوام په اړه خبرداری ورکړی لیکي: «که دا وضعیت تر ۲۰۳۰ پورې دوام وکړي، له دوه میلیونه ډېرې نجونې به په داسې یوه هېواد کې، چې دا مهال په نړۍ کې د ښځینه سواد تر ټولو ټیټه کچه لري، له لومړنیو زده کړو پورته زده کړو څخه محرومې شي.»
طالبانو په تېرو کابو پنځو کلونو کې د ښځو او نجونو په وړاندې د محدودیتونو په لګولو سره هغوی، له خپلو لومړنیو بنسټیزونو حقونو او آزادیو له هغې جملې د زده کړې او کار له حق څخه بې برخې کړې دي.
یادې ډلې په دې موده کې د نړیوالو غوښتنې ته په نه پاملرنې سره، نه یوازې د ښځو او نجونو د حقونو او خپلواکیو په وړاندې محدودیتونه لغوه کړي نه دي، بلکې لا یې زیات کړي دي.
نړیوالې ټولنې او د بشري حقونو بنسټونو طالبان تل د بشري حقونو په ځانګړې توګه د افغان ښځو له حقونو په سرغړونې تورن کړي او له ښځو سره د دې ډلې چلند یې «جنسیتي توپیر» بللی دی.
