د افغانستان لپاره د برېتانیا سفارت په یوه اعلامیه کې د نجونو په طبي زده کړو د طالبانو د محدودیتونو لغوه کولو غوښتنه وکړه.
رخشانه: دې سفارت پرون ناوخته (سه شنبې د غوايي ۱۵ مه) د قابلو نړیوالې ورځې په مناسبت ویلي، د افغان قابله ښځو څخه ملاتړ کوي.
د افغانستان لپاره د برېتانیا سفارت د نجونو په طبي زده کړو د طالبانو د محدودیتونو لغوه کولو غوښتنه کړې وايي، د قابلو کار د ټولو لپاره حیاتي دی.
دې سفارت د طب برخه کې د نجونو په زده کړه د طالبانو د محدودیتونو پر دوام اندېښنه ښودلې لیکي، د افغانستان راتلونکې په «خطر» کې ده.
افغانستان کې د ملګرو ملتونو د وګړو صندوق استازي کوابینا اسنتي انتیاموا ویلي، افغانستان کې تېر کال کابو ۳۴ زره قابلې فارغې شوې، چې یوازې ۱۸ سلنه یې به کار بوختې دي.
ملګرو ملتونو څه موده وړاندې په یوه راپور کې لیکلي وو، د نجونو په زده کړه او د ښځو پر کار د طالبانو محدودیتونه به کولی شي تر ۲۰۳۰ پورې دا هېواد د ۲۵ زره زیاتو ښځینه ښوونکو او روغتیايي کارکوونکو له کمښت سره مخ کړي.
طالبانو د ښځینه روغتیايي کارکوونکو پر فعالیتونو د محدودیتونو تر څنګ، د نجونو پر مخ هم د طبي انستېتیوتونو دروازې بندې کړې دي.
ملګرو ملتونو په وار وار ویلي، په زده کړو او ښځینه روغتیايي کارکوونکو د طالبانو محدودیتونو د افغانستان روغتیايي نظام کمزوری کړی دی.
طالبانو ناروغانو ته د روغتیايي خدماتو وړاندې کولو او په روغتیايي مرکزونو کې د روغتیايي ښځینه کارکوونکو پر فعالیت محدودیتونه لګولي دي. دا مهال ښځینه روغتیايي کارکوونکې باید له خپل شرعي محرم سره روغتیايي مرکزونو ته لاړې شي او نارینه ډاکتران حق نه لري، چې د ښځینه ناروغانو درملنه وکړي.
