کونړ کې ځايي طالب چارواکي وايي، د دې ولایت نړنګ ولسوالۍ کې یوه ماشومه نجلۍ، د ناپېژاندو کسانو له خوا په بې رحمه ډول وژل شوې ده.
رخشانه: کونړ کې د طالبانو د امنیه قوماندانۍ ویاند فریدون دهقان ویلي، دا پېښه د تېرې پنشنبې د (غبرګولي ۲۱ مه) د نړنګ ولسوالۍ «باډیل دره» کې رامنځ ته شوې ده.
دهقان زیاته کړې، دا ماشومه نجلۍ ساحره نومېږي او ۱۰ کلنه وه. هغه د ښوونځي په درېیم ټولګي کې وه.
نوموړي، د دې نجلۍ د وژنې د اصلي دلیل او وژل کېدو د څرنګوالي په اړه څه نه دي ویلي.
د سیمې دوو تنو اوسېدونکو د هویت پټ ساتلو سره رخشانې رسنۍ ته ویلي، دا ماشومه نجلۍ «باډیل دره» کې د خپل ماما کور ته تللې وه.
د سرچینو په وینا، نجلۍ د ناپېژاندو کسانو له خوا د چاقو په ګذارونو په بې رحمه ډول وژل شوې ده.
سرچینو زیاته کړې، د دې ماشوم خېټه په چاقو څېرې کړای شوې، ګردې او زړه یې ترې کښل شوي او وروسته یې جسد د سړک څنګ ته غورځولی دی.
د دې نجلۍ د کورنۍ غړو ویلي، له هېچا سره شخصي دښمني نه لري. هغوی د قاتلانو د پېژندنې او نیول کېدو غوښتنه کړې ده.
کونړ کې د طالبانو امنیه قوماندانۍ ادعا کړې، چې د پېښې په تړاو یو تن د دوی د امنیتي ځواکونو له خوا نیول شوی دی.
د طالبانو تر بیا واکمنېدو وروسته، په ټول هېواد کې جنايي پېښې، وژنې او د ښځو او نجونو ځان وژنې په بې مخینې توګه زیاتې شوې دي.
