هلمند کې د طالبانو د اطلاعاتو او کلتور ریاست وايي، د دې ولایت سنګین ولسوالۍ کې د دوه کړۍ پخوانیو ماینونو په چاودنه کې یو ماشوم وژل شوی او شپږ تنه نور ټپیان شوي دي.
رخشانه: هلمند کې د طالبانو د اطلاعاتو او کلتور ریاست په یوه خبرپاڼه کې لیکلي، دا دوه کړۍ ماینونه نن سهار (شنبې د غبرګولي ۲۳ مه) د سنګین ولسوالۍ (مجید چوک او آب ژرندي» کې په دوه جلا پېښو کې چاودلي دي.
خبرپاڼه کې راوړل شوي، یوه کړۍ پخوانی ماین نن د سنګین ولسوالۍ «مجید چوک» کې چاودلی، چې په ترڅ کې یې څلور ماشومان ټپیان شوي دي.
د خبرپاڼې له مخې، دا ماشومان د درملنې په موخه روغتون ته لېږدول شوي، خو د روغتیايي وضعیت په اړه یې څه نه دي ویل شوي.
خبرپاڼه وايي، په یوه بله پېښه کې هم یوه کړۍ پخوانی ماین، نن سهار ۱۰ بجې د سنګین ولسوالۍ «آب ژرندې» سیمه کې چاودلی دی.
سرچینه کاږي، په دې ماین چاودنه کې یو ماشوم وژل شوی او دوه نور ټپیان شوي دي.
هلمند کې د طالبانو د اطلاعاتو او کلتور ریاست ویلي، د دې پېښې د ټپیانو روغتیايي حالت د ډاډ وړ دی.
دې ریاست د یادې پېښې د ټپیانو د عمر او جنسیت په اړه څه نه دي ویلي.
دا په داسې حال کې ده، چې د تېرې اوونۍ د دوشنبې په ورځ د پکتیکا برمل ولسوالۍ کې د «توپ» د یوې پخوانۍ مرمۍ د چاودنې له امله، د پنځو ماشومانو په ګډون اووه تنه وژل شوي او څلور نور ماشومان ټپیان شوي وو.
د یوناما د راپور له مخې، افغانستان کې د ماینونو او ناچاودو توکو د چاودنو ۸۰ سلنه قربانیان ماشومان دي.
