غزني ولایت کې د طالبانو امنیه قومانداني وايي، د غزني ښار درېیمې حوزې اړوند سیمه کې د یوې پخوانۍ مرمۍ د چاودنې له امله یو ماشوم وژل شوی او دوه نور ټپيان شوي دي.
رخشانه: غزني کې د طالبانو امنیه قوماندانۍ ویلي، دا پېښه پرون مازیګر (یکشنبې د غبرګولي ۲۴ مه) په «دشت کیوان» سیمه کې رامنځ ته شوې ده.
په خبرپاڼه کې ویل شوي، پېښه هغه مهال رامنځ ته شوې، چې ماشومانو پخوانۍ مرمۍ پیدا کړې او د هغې د لېږدولو هوډ یې کړی وو.
دې مرمۍ د ماشومانو لوري د لېږدولو پر مهال چاودنه کړې، چې په ترڅ کې یې یو ماشوم وژل شوی او دوه تنه نور ټپیان شوي دي.
وژل شوی ماشوم ۱۲ کلن وو. د دې پېښې د ټپیانو د عمر او هویت په اړه څه نه دي ویل شوي.
د پېښې ټپیان د درملنې لپاره روغتون ته لېږدول شوي او روغتیايي حالت یې د ډاډ وړ ښودل شوی دی.
دا په داسې حال کې ده، چې د روانې اوونۍ د شنبې په ورځ د هلمند سنګین ولسوالۍ کې دوه کړۍ پخوانیو ماین چاودنو یو ماشوم و واژه او شپږ تنه نور یې ټپیان کړل.
هر کال په ټول هېواد کې لسګونه تنه په ځانګړې توګه ماشومان د جګړو مهال د پاتې شونو ماینونو او ناچاودو توکو چاودنو قرباني کېږي. د یوناما د راپور له مخې، د دې چاودنو ۸۰ سلنه قربانیان ماشومان دي.
افغانستان په نړۍ کې د دریو هېوادونو څخه یو له تر ټولو ډېر په ماینونو او ناچاودو توکو لړلی هېواد دی.
