کاناډا کې مېشتو یو شمېر افغان کډوالو د طالبانو له خوا د هرات جبرئیل ښارګوټي کې، د ښځو نیولو او تېرې اوونۍ د لاریون ځپلو غبرګون کې اعتراضي غونډه وکړه.
رخشانه: دا اعتراضي غونډه پرون یکشنبې د (غبرګولي ۲۴ مه) له ماسپښين وروسته، د کاناډا ونکور ښار کې لسګونو افغان کډوالو جوړه کړې وه.
د دې اعتراضي غونډې ګډونوالو «مرګ پر طالبانو»، «جنستي توپیر ته نه» او د «افغان ښځو لپاره آزادۍ» شعارونه ورکول.
هغوی په دې اعتراضي غونډه کې په ګډون سره، په افغانستان کې د طالبانو تر واک لاندې معترضو ښځو او خلکو څخه خپل ملاتړ اعلان کړ.
معترضینو له نړیوالې ټولنې وغوښتل، چې د افغان ښځو د وضعیت په اړه د اعلامیو صادرولو پر ځای د افغانستان له خلکو د عملي ملاتړ او په افغانستان کې د بشري حقونو پراخو سرغړونو ته د پای ورکولو لپاره لاس په کار شي.
دوی ټینګار وکړ، چې د دوی اساسي غوښتنه، د افغان ښځو له انساني کرامت، د تابعیت له حقونو او بنسټیزو آزادیو برخمنېدا ده.
د دې اعتراضي غونډې ګډونوالو د یوه داسې مشروع او حساب ورکوونکي حکومت پر جوړېدو ټینګار وکړ، چې د افغانانو د ارادې استازیتوب وکړي.
