کابل کې د طالبانو د امنیه قوماندانۍ ویاند خالد ځدراڼ وايي، هغه کس چې درې نجونې یې د کابل ښار د شپږمې ناحیې اړوند سیمه کې په موټر وهلې او ټپي کړې وې، نیول شوی دی.
رخشانه: ځدراڼ نن (دوشنبې د غبرګولي ۲۵ مه) په خپله اېکس پاڼه د یاد کس د نیولو خبر ورکړی دی.
کابل کې د طالبانو د امنیه قوماندانۍ ویاند ویلي، دا کس له خپل موټر سره یو ځای نیول شوی دی.
نوموړې د دې کس د هویت په اړه څه نه دي ویلي.
د طالبانو د امنیه قوماندانۍ ویاند وايي، د دې کس دوسیه د څېړلو په حال کې ده.
دې پېښه کې د ټپي شویو نجونو د روغتیايي وضعیت په اړه جزیات په لاس کې نشته.
څو ورځې وړاندې په یوه ویډیو کې چې په خواله رسنیو په پراخه کچه خپره شوې، لیدل کېږي، چې یو لنډکروزر موټر څو تنه نجونې وهي.
په دې ویډیو کې لیدل کېږي، څو تنه نجونې، چې د سړک په غاړه روانې دي، ناڅاپه د یوه سپین رنګه موټر له خوا په سرعت وهلی کېږي او له سیمې تېښته کوي.
د ټولنیزو شبکو کاروونکو لیکلي، دا موټر د طالبانو ډلې د یوه غړي اړوند دی او هغه نجونې چې په موټر وهل شوې دي، د پنجشېر ولایت اوسېدونکې دي.
په ټولنیزو شبکو د دې ویډیو له خپرېدو وروسته، کابل کې د طالبانو د امنیه قوماندانۍ ویاند اعلان وکړ، چې د دې پېښې عاملین پېژندل شوي دي.
