د امریکا نیویارک کې مېشتو یو شمېر افغان کډوالو د طالبانو تر واک لاندې افغان ښځو او نجونو د ملاتړ په موخه اعتراضي غونډه وکړه.
رخشانه: دا اعتراضي غونډه پرون دوشنبې د (غبرګولي ۱۵ مه) د امریکا نیویارک آیالت آلبني ښار کې د مېشتو یو شمېر افغان کډوالو له خوا جوړه شوه.
د دې غونډې ګډنواوالو ویلي، افغان ښځې او نجونې د طالبانو د محدودیتونو په دلیل، له خپلو اساسي حقونو له هغې جملې د زده کړې، کار او آزادۍ له حق نه محرومې دي.
دوی زیاته کړې ده: «موږ رټول شوي یو تر څو د افغان ښځو او نجونو چې له خپلو اساسي حقونو محرومې دي، په استازیتوب خپل غږ پورته کړو.»
امریکا کې مېشت کډوالو ویلي دي: «موږ د دې غوندې له لارې هڅه وکړه، چې نړیوالو ته وریاده کړو، چې افغان ښځې او نجونې نه دي هېرې شوې.»
دوی، په افغانستان کې د جنسیتي توپیر د پای ته رسېدو غوښتنه وکړه او له نړوالې ټولنې یې وغوښتل، چې له افغان ښځو او نجونو ملاتړ وکړي.
د دې اعتراضي غونډې ګډونوالو همدارنګه ویلي «د [افغان ښځو اونجونو] د عزت، برابرۍ او بشري حقونو لپاره روانه مبارزه د دوامداره پاملرنې او ملاتړ وړ ده.»
له تېرو څو ورځو راهیسې په یو شمېر امریکايي او اروپايي هېوادونو کې، د افغان کډوالو له خوا په افغانستان کې د ښځو او نجونو په ملاتړ اعتراضي غونډې جوړېږي.
دا اعتراضي غونډې له هغې وروسته زیاتې شوې، چې طالبانو تېره اوونۍ د هرات ولایت جبرئیل سیمه کې د «بې حجابۍ په تور» د ښځو او ځوانو نجونو د نیولو نوې لړۍ پیل کړې ده.
باوري سرچینې او راپورونه وايي، طالبانو شاوخوا ۳۰ ښځې او ځوانې نجونې نیولې او نامعلوم ځای ته یې لېږدولې دي.
طالبانو نه یوازې د ښځو او نجونو په نیونو لاس پورې کړی، بلکې د دوی پر ضد اعتراضي غونډې یې هم ځپلې، چې د راپورونو له مخې یو ماشوم او سړی په کې وژل شوي او درې تنه نور ټپیان شوي دي.
د طالبانو دې اقدام په کور د ننه او بهر د نړیوالو بنسټونو، مدني فعالانو او د بشري حقونو او ښځو مدافع بنسټونو سخت غبرګونونه راپارولي دي.
